O Concello de Cervo anuncia que asumirá a xestión da Edar de San Cibrao con medios públicos municipais

Augas de Galicia agarda que o emisario submarino, que permitirá a entrada en funcionamento da depuradora, estea rematado nun mes e medio

Cervo, 19 de xuño de 2013-O Concello de Cervo segue avanzando na inminente posta en marcha da Estación Depuradora de Augas Residuais de San Cibrao. Para iso, esta semana celebrou unha reunión de traballo na que participou o alcalde de Cervo, Alfonso Villares, a edil de Medio Ambiente, Begoña Alonso, técnicos municipais, técnicos de Augas de Galicia e da Confederación Hidrográfica do Norte.

Unha xuntanza coa que o Concello quixo coñecer todos os detalles deste equipamento co obxectivo de asumir directamente o seu mantemento e xestión. Deste xeito, o Concello ocuparase de xestionar a depuradora de forma pública, co que “queremos apostar por un servizo público municipal que permitirá atender a depuradora de forma máis directa”, explica o rexedor.

Ademais da reunión, responsables do Concello e técnicos das diferentes entidades realizaron unha visita á planta, situada no polígono de Cuíña. Unha EDAR que está preparada para entrar en funcionamento, só pendente da posta en marcha do emisario submarino que permitirá afastar lonxe da primeira liña de costa as augas residuais tratadas e depuradas na planta procedentes da rede de saneamento.

Unhas obras, as do emisario submarino, que están a piques de finalizar, e que só teñen pendente a instalación dos difusores, polo que poderían estar rematadas nun mes e medio segundo datos de Augas de Galicia, que é quen financia este proxecto que ten un custo de 1,8 millóns de euros. Hai que ter en conta que para acometer esta última fase submarina do emisario teñen que reunirse unha serie de condicións meteorolóxicas que non se deron ata o de agora e que obrigaron a retrasar os traballos.