Augas de Galicia elaborará un estudio de viabilidade para mellorar o saneamento de Burela

Burela, 8 de novembro de 2013. Técnicos de Augas de Galicia visitaron a actual depuradora de augas residuais co obxectivo de elaborar un estudio de viabilidade para mellorar o saneamento do concello de Burela. O alcalde, José Mª González Barcia, estima que ese estudio podería estar elaborado nun prazo duns catro ou cinco meses.

O rexedor contou que “durante a mañá de hoxe técnicos de Augas de Galicia estiveron aquí, no Concello de Burela, para ver co goberno municipal as instalacións da actual estación depuradora de augas residuais e ver o seu funcionamento de cara a elaborar un estudio de viabilidade para a mellora da rede de saneamento de Burela”.

González Barcia explicou que “a estación depuradora de augas residuais de Burela é unha das últimas plantas físico químicas que se fixo no seu momento e evidentemente ante a perspectiva de que a poboación de Burela aumente loxicamente temos que ver a situación que ten a planta actual e ver cales son as posibilidades para mellorar o tramo final do saneamento integral do noso concello. Precisamente para iso os técnicos estiveron vendo con nosoutros as distintas instalacións, coñeceron de primeira man a través dos técnicos municipais e do propio equipo de goberno os planos sobre a rede de saneamento, sobre a rede de colectores e sobre a rede de pluviais que agora mesmo ten en marcha o Concello. E todos estes datos xunto cos que xa teñen eles sobre o funcionamento actual da estación depuradora de augas residuais son os que nos van levar a establecer un plan de viabilidade para ver de mellorar a situación actual que temos”.

O alcalde burelés dixo que “non se pode concretar agora cal será a solución proposta por Augas de Galicia. Eu entendo que o estudio de viabilidade pode estar elaborado nun prazo de tres, catro ou, como moito, cinco meses e a partir de aí xa saberemos a que aternos”.

José Mª González Barcia lembrou que “houbo varias conversas tanto con Augas de Galicia como coa propia Consellería de Medio Ambiente sobre a necesidade de mellorar as instalacións da estación depuradora de augas residuais do noso concello durante estes xa máis de dous anos. De feito estudiarase a posibilidade de enmarcala dentro do plan xeral de ordenación municipal e despois, tendo en conta que Portos de Galicia estaba elaborando o seu plan de usos do espazo portuario de Burela, suprimímola desa aprobación inicial. Pero este é un paso moi importante de cara a mellorar as instalacións que temos actualmente dun xeito ou doutro. Non se pode agora mesmo establecer ningunha solución a priori, pero isto demostra o interese da Xunta de Galicia por mellorar as instalacións que temos e polo tanto o saneamento do concello de Burela”. O rexedor engadiu que “ao largo desas conversas que houbo durante estes dous anos foron manifestándose distintas situacións que se tiñan provocado na actual Edar e isto evidentemente é un paso moi significativo porque demostra o compromiso de Augas de Galicia e da Xunta para mellorar estas instalacións”.

Para o alcalde burelés “hai que darlle tempo ao tempo, sabemos que estas actuacións non se programan dun día para outro, leva tempo a concreción das solucións e loxicamente son obras que teñen un custo importante. Nos vamos estar en contacto con Augas de Galicia e cando o estudio de viabilidade estea rematado e enriba da mesa sobre ese traballo nós tamén daremos a nosa opinión, en todo caso buscando sempre un consenso con Augas de Galicia, porque en definitiva van ser eles os que dun xeito ou doutro aborden economicamente as obras. O Concello de Burela non ten agora mesmo capacidade financeira para facerlle fronte a unha actuación dese tipo, pero en todo caso a Xunta de Galicia sabe que pode contar coa nosa colaboración para dar todos os pasos precisos de cara a levar a cabo as melloras que todos queremos”.

Na visita realizada á Edar acompañando aos técnicos de Augas de Galicia participaron o alcalde e a concelleira de Medio Ambiente, Patricia López Eijo.