Comezan as obras de reparación das deficiencias do solar do parque do Campón en Burela

Burela, 7 de abril de 2014. O pasado venres comezaron as obras de adecentamento do solar do Parque do Campón que fai esquina nas rúas Camiño Real e Rafael Vior. Ditas obras lévanse a cabo para evitar riscos e recuperar ao cento por cento a seguridade tanto dentro coma fóra do propio solar. As actuacións corren a cargo da sociedade propietaria do solar.

O alcalde de Burela, José María González Barcia, manifestou que “desde o Concello viñamos seguindo o estado do solar desde hai tempo, porque presentaba sinais inequívocas de deterioro en canto á seguridade. A principios do pasado mes de febreiro, elaboramos un informe técnico que lle foi remitido á sociedade propietaria do solar o día tres dese mesmo mes, facendo constar a urxencia de realizar unha serie de actuacións tendentes a garantir a seguridade do solar tanto dentro coma fóra do mesmo”.

Segundo o rexedor “nos últimos días de febreiro o Concello encargou un informe técnico externo, e simultaneamente mantivemos conversas con representantes da sociedade propietaria do inmoble, conversas que se materializaron nunha convocatoria formal para unha reunión que tivo lugar o trece de marzo no Concello, e na que se constatou a intención da sociedade propietaria de solucionar os problemas que suscita o actual estado do solar”.

O rexedor explicou que “o Concello actuando en todo momento con vontade de diálogo pero tamén conforme ao que marca a lexislación vixente, e para salvagardar os intereses municipais, fixo entrega ese mesmo día dunha orde de execución, que logo dos prazos legalmente establecidos está sendo atendida pola sociedade propietaria”.

José María González Barcia agarda que “a sociedade propietaria do solar actúe, ademais de con celeridade, conforme ao estipulado tanto na documentación elaborada polo Concello, e que lles foi trasladada, como nas conversas que con eles mantivemos, e que en todo momento transcorreron con espírito construtivo”.

Finalmente, o rexedor indicou que “na comisión informativa de obras e urbanismo do pasado 24 de marzo, eu mesmo e por iniciativa propia informei con detalle aos grupos da oposición. O que de verdade lamento, pero non me sorprende, é que o PSOE saíse con este asunto o quince de marzo, sen terse informado previamente dos pasos que se tiñan dado desde o goberno municipal e desde os servizos técnicos municipais, que como se ve non foron poucos”.