Rodas (BNG) insta ao Goberno galego a recuperar o Plan da sardiña do ano 2000

Santiago de Compostela, 30 de abril, 2014. O deputado do BNG, Daniel Rodas reclamou hoxe na Comisión de pesca restituír o Plan da sardiña do ano 2000 ao fin de poñer en marcha “un paro biolóxico da sardiña” subvencionado polo Goberno galego.

O parlamentario, a través dunha Proposición non de lei que foi rexeitada polo Partido popular, asegurou que o borrador remitido polo Goberno español para a pesca representa “unha caída do 60%” a respecto das capturas do ano 2013 ao que sumou as recentes declaracións da titular de Mar, Rosa Quintana negando a existencia de problemas coa sardiña ibero-atlántica.

O Partido popular recoñeceu ante o deputado do BNG, os graves problemas negados pola conselleira e o deputado nacionalista reiterou que non é a primeira vez que Quintana incorre neste tipo de afirmacións.

Rodas insistiu na necesidade de dar solución a un problema que afecta as pesquerías do cerco e do xeito, “a conselleira, dixo, non pode ignorar as demandas do sector”, polo que reclamou restituír o plan da sardiña do ano 2000 co fin de paralizar a actividade e subvencionar o paro das tripulacións e propietarios das embarcacións.

Pola súa parte, o portavoz do Partido popular, José Manuel Balseiro admitiu a “dramática situación” do sector pero afirmou que a proposta do BNG “chega tarde” e o PP defenderá a proposta remitida por Madrid que suporá un reparto das capturas baixo criterios de capturas históricas ao que o nacionalista respondeu que a flota galega leva máis de tres décadas regulada e cun día menos de actividade.

“ O mesmo PP que contemplaba no ano 2000 medidas para a recuperación da sardiña, agora supeditase aos ditados de Madrid”, afirmou o deputado.

Rodas concluíu a súa intervención lamentando a “falta de criterio do Partido popular porque condena á flota galega a súa desaparición”.