En Ribadeo quedou constituída a comisión organizadora do Entroido 2015, que preside David Martínez

Ribadeo, 22 de xaneiro de 2015.- En Ribadeo quedou constituída a comisión organizadora do Entroido 2015, que preside David Martínez. Da mesma forman parte membros das charangas, de Acisa e do Concello, ademais de persoas que levan moitos anos vinculadas a esta tradicional cita.

David Martínez explicou que “a comisión está constituída por xente que estivo en edicións anteriores, hai algúns que levan ata quince anos, tamén están representantes de Acisa, do Concello e das charangas. Consideramos que tiñan que estar aquí porque levan toda a vida nisto”.

A comisión organizadora do Entroido traballa contra reloxo: “quedan pouco máis de tres semanas e a idea é manter a esencia desta cita, que é o desfile, a saída da comparsa do porco e a queima do Entroido, pero haberá novidades para involucrar á hostalería e ao comercio… para que a xente veña saír por Ribadeo, sen esquecernos dos nenos e das nenas”.

Aínda que o programa non está pechado “a principal novidade será unha gala-pregón na que haberá moito humor”. David Martínez engade que “non queremos contar máis para que sexa unha sorpresa para todos”.
O programa do Entroido de Ribadeo será presentado proximamente.