Sorprendese o PP da opinión do director da Burela Blues Band pois esperaba a da concelleira de Educación

Nota de Prensa

EM RELACIÓN CO COMUNICADO DO REPRESENTANTE DA BURELA BLUES BAND.

O GMPP de Burela, ante a nota feita pública polo “máximo representante” da Burela Blues Band, quere manifestar que non está sorprendido da súa resposta, ainda que si polo tono que destila, e porque sexa precisamente el, e non a Concelleira Delegada de Educación, quen aclare esta situación.

Antes de nada, deixar claro que non temos nada en contra da Burela Blues Band porque, efectivamente, o PP axudou a creala, como creou e potenciou a Escola de Mùsica e como organizou outras moitas actividades de potenciación das capacidades musicais dos rapaces e rapazas de Burela: edición de discos, concertos, etc.. De aí que a nosa nota se basase en formular preguntas sobre as que seguimos a ter dúbidas, e agora máis fortes se cabe.

Poderíamos dar por boas certas explicacións (por exemplo, ó traslado dos rapaces e propiedade de certos insturmentos) se fosen formuladas pola Concelleira Delegada, polo que frente á “decepción e indignación”, fonda pena é a que nos dá que non sexa quen tiña que ser quen dea as oportunas explicacións. Alá eles.

Dito esto, queda claro que a Burela Blues Band forma parte da Escola Municipal de Música, porque nas bases de contratación do profesorado, de 2007 e de 2009, así consta. Pertenza que implicitamente recoñece o “máximo representante” da Blues Band. Esto quere decir que se a Escola está pechada, os profesores están sen contrato, co que non hai director de nada nin profesor de nada, en tanto en canto non se resolva o proceso selectivo. Ou sexa, non hai ningunha relación legal, durante ese tempo, entre o profesorado e o Concello. Como se pode organizar un “bolo”, unha actuación, por todo ou parte do profesorado a Escola usando un nome que é propiedade do Concello de Burela se non hai relación legal con el?

Por eso mesmo, resulta chocante que se use para ir tocar a Lourenzá un nome que é propiedade do Concello. Se querían ir tocar, que nos parece ben, que fosen con outro nome. Ademais, non queremos pensar que no momento da sinatura do contrato da actuación xa se soubese que a actividade da Escola se suspendía o día trinta de Setembro, porque se da a casualidade que ese mesmo día remataban os contratos de “todo” o profesorado da Escola. Polo indicado, o “máximo representante” da Burela Blues Band non é quen para asinar ningún contrato de ningunha actuación

Esta cuestión non é menor, porque estamos a falar do uso público dun nome do Concello de Burela de forma “alegal”. E se pasa algo durante a actuación? Que pasaría? Quen se responsabilizaria? Que diría o Concello de Burela? Estes son temas mui serios que non se deben tratar con “indignación”, senon con serenidade e rigor.

Por último, non queda claro que contía se cobrou e en nome de quen se cobrou. Se se toca co nome de Burela Blues Band, os cartos hai que depositalos no Concello, e supoñemos que haberá factura e documento acreditativo. E será o concello o que destine eses cartos ó que estime oportuno. Se se toca con outro nome, ese xa é outro cantar.

Eso vai levar a este Grupo Político a solicitar no Concello toda a documentación referida a actuacións da Burela Blues Band, contratos, facturas emitidas, documentos acreditativos de cobro, etc., dos anos 2008 e 2009.

Finalmente, indicar que desde o PP non polemizaremos coa Burela Blues Band. Deben entenderse as nosas manifestacións  como unha aportación para que as cousas funcionen o mellor posible. Nós a quen lle pedimos explicacións é a Concelleira de Educación, Lucía Bouza, e ó Alcalde, que é o máximo responsable, porque estamos a falar de cuestións políticas, e en ningún caso artísticas, algo que parece que alguén ou non o tén claro, ou se deixa levar por unha pasión inducida. Nós non polemizamos nin con músicos nin con pais, e non aceptaríamos que quen tén que respostar se esconda neste asunto. E eso lle pode provocar a alguén desasosego de espíritu ou problemas de conciencia. E o Grupo Municipal Popular, de espíritu, ben, e de tranquilidade de conciencia, cousa que tamén é importante, tanto ou máis co espíritu, mui ben.