AGEe esixe á Comisión Europea e Consello maior eficiencia na resolución das preguntas parlamentarias

Bruxelas, 23 Maio 2016. A eurodeputada de Alternativa Galega de Esquerda en Europa, Lídia Senra, vén de rexistrar unha pregunta parlamentaria dirixida á Comisión Europea (CE) facendo notar as eivas no procedemento de resposta das mesmas por parte tanto da CE como do Consello.

A fórmula das preguntas parlamentares, que permite que as eurodeputadas/os realicen consultas de temática libre, por escrito, directamente dirixidas á Comisión e ao Consello, vén sufrindo restricións nestes últimos anos que merman significativamente a calidade do diálogo entre cidadanía e institucións europeas.

Na anterior lexislatura estas preguntas pasaron de ser válidas sempre e cando ocupasen un único formulario[1] -independentemente do tamaño e fonte- a seren limitadas a un máximo de 25 liñas a Times New Roman 12 e, posteriormente, constreñidas a un máximo de 200 palabras -sempre sen posibilidade de información adxunta-. Ademais, durante a lexislatura actual, restrinxiuse o máximo de 10 preguntas mensuais a unicamente cinco ao mes.

A esta deterioro da fórmula das preguntas parlamentares engádese tamén unha certa tendencia por parte de Comisión e Consello a eludir pronunciarse con claridade sobre as consultas realizadas. A raíz da resposta obtida a unha pregunta relativa ao impacto social e ecolóxico da concesión mineira Isabela II -explotación de recursos mineiros de 46 km2 dos termos municipais de Zas, Santa Comba, Vimianzo e Coristanco (A Coruña)-, na que a Comisión non só elude pronunciarse alegando “non ter coñecemento”, senón que mesmo para esta resposta remite á contestación dunha pregunta sobre o proxecto mineiro da empresa canadense Edgewater en Corcoesto, da que por suposto tampouco tiña “coñecemento”, dende Alternativa Galega de Esquerda en Europa decidimos consultar á Comisión Europea sobre o procedemento en si das preguntas parlamentarias.

Xa que logo, sinalamos na nosa “pregunta sobre as preguntas”, que debido ás reiteradas respostas por parte da Comisión Europea aludindo á imposibilidade de valoración por carecer de información ao respecto da maioría das consultas realizadas, e a prol de aumentar a eficiencia deste mecanismo e minimizar a frustración xerada ao comprobar que Comisión e Consello descoñecen grande número das problemáticas das que a cidadanía está a solicitar a súa avaliación, a eurodeputada galega Lídia Senra solicitou en primeiro termo saber “como é exactamente o procemento a través do cal a Comisión solicita información aos Estados membro ou gobernos como os das Comunidades Auntónomas”.

Afondando no modo en que solicita información aos gobernos intracomunitarios, Senra tamén pediu á Comisión que concrete “cales son os asuntos sobre os que as autoridades estatais e locais deben informar previamente á Comisión”.

Finalmente, a eurodeputada galega remite directamente ao desleixo das institucións europeas no tocante á súa responsabilidade informativa e razoa: cando se rexistra unha pregunta parlamentar, nos casos nos que a Comsión non ten “ningunha información” que indique un posíbel incumprimento das disposicións pertinentes da lexislación da UE, non debería a Comisión en primeiro lugar requirir esas informacións ás autoridades ou axentes informativos pertinentes para precisamente poder respostar á pregunta formulada?”.

As preguntas parlamentares, xunto co rexistro directo de denuncias a través da Comisión de Peticións -como a realizada por exemplo recentemente por SOS Sanidade Pública co apoio de AGEe-, “son dos poucos mecanismos que nos permiten dirixirnos directamente ás institucións europeas”, lembrou Lídia Senra, “cando a Comisión ou o Consello actúan limitando a súa eficacia están incorrendo unha vez máis na merma da calidade democrática dunha UE que, lamentabelmente, cada día afástase máis dos pobos, ao tempo que prioriza a interlocución cos poderes económicos e financieiros e os seus lobbies”.