O luns darán comezo os traballos de pintado da sinalización horizontal en varias rúas de Burela

Burela, 8 de marzo de 2017. O vindeiro luns, día 13, darán comezo os traballos de pintado da sinalización horizontal en varias rúas de Burela. A obra está incluída no POS do pasado ano e suporá un investimento duns 45.000 euros, segundo lembrou esta mañá o concelleiro de Obras, Ramiro Fernández Rey.

O edil socialista explicou que “estes traballos iniciaranse na rúa Eijo Garay e seguirán por outras vías da localidade. Vanse pintar os pasos de peóns, as prazas de aparcamento e as zonas de carga e descarga, entre outras. Haberá momentos nos que se teñan que pechar ao tráfico rodado as rúas nas que se estea a actuar, polo que xa pedimos desculpas de antemán polas molestias que se poidan ocasionar. Pero para que os operarios fagan a súa labor da mellor forma posible produciranse peches puntuais”.

Fernández Rey subliñou que “a marcha destas obras dependerá da climatoloxía que teñamos ao longo dos vindeiros días. En principio será algo rápido, salvo que se poña a chover durante moitas xornadas”.