Cervo, 08 de setembro de 2017.- O Concello de Cervo vén de acometer traballos de acondicionamento e mellora no Campo da Festa do burgo de Trasbar, que o vindeiro 16 e 17 de setembro celebra as súas Festas Patronais, a Romaría de Santa Eufemia.
O alcalde de Cervo, Alfonso Villares e o edil de obras, Plácido Pérez, desprazáronse ata o recinto, onde acompañados por técnicos municipais e por varios membros da Asociación de Veciños de Trasbar, supervisaron a actuación para comprobar que todo está a punto para a celebración da Festa.
En concreto, Villares apuntou que “se reforzou a iluminación no recinto da festa coa instalación de varias lámpadas led, coas que, ao tempo que se gaña en luz, tamén se mellora a eficiencia enerxética”.
Así mesmo, -engadiu- “retiramos un poste que estaba ubicado no centro da explanada e que obstaculizaba na celebración deste tipo de eventos, instalando as novas luminarias no perímetro do campo da festa; e tamén melloramos a instalación eléctrica no Local Social de Trasbar, no que os veciños realizan múltiples actividades ao longo do ano”
Villares apuntou que con estes traballos “respondemos neste caso ás demandas dos veciños de Trasbar, como tamén vimos facendo con outros Burgos e asociacións do noso Concello tentando axudar en todo o que está na nosa man apoiando o gran traballo altruísta que fan; e atendendo, en todo o que sexa posible, a súas necesidades”.
A Romaría de Santa Eufemia, organizada pola Asociación de Veciños de Trasbar coa colaboración do Concello de Cervo, terá lugar a fin de semana do 16 e 17 de setembro.
O sábado, ás 7:00 horas comezarán a confeccionar a alfombra floral a carón da Capela, ás 13:00 horas será a misa solemne de Santa Eufemia cantada polo Coro de Cervo; e a continuación terá lugar a sesión vermú a cargo da orquestra Os Magos.
Xa pola noite, a partir das 22:30 horas, dará comezo a Gran Verbena amenizada polas orquestras Magos e o Dúo Epo-K.
Ao remate da festa haberá degustación gratuíta de caldo galego.
O domingo ás 13:15 horas está prevista a misa solemne na honra da Virxe do Carme e de San Antonio cantada polo Coro de Cervo e a continuación terá lugar a sesión vermú a cargo do Dúo Epo-K.
Disponse de zona de aparcamento gratuíto nas inmediacións do campo da festa.
O Concello de Cervo, convida, a todos, veciños e visitantes, a que desfruten desta Festa a vindeira fin de semana.
O Concello de Cervo acondiciona o campo da festa de Trasbar que será o escenario da romaría de Santa Eufemia que terá lugar o 16 e 17 de setembro
Relacionado
O Concello destaca que este novo éxito é froito do compromiso, do esforzo e da dedicación constante do deportista, cualidades que lle permiten seguir acadando resultados destacados a nivel estatal. Desde a entidade municipal transmítense os parabéns a González Villares por este subcampionato de España.
A proba, organizada polo CP Altrúan, reuniu máis de 130 palistas dos seis clubs lucenses de augas tranquilas que participan na competición: o propio Altruán, o CD San Ciprián, o Club Kayak Foz, o CP Viveiro Urban Hotel, o Cidade de Lugo e o Club Fluvial de Lugo. O deputado de Mocidade Daniel García entregou os premios da proba, na que Club Fluvial de Lugo, Cidade de Lugo e Altruán coparon o podio por equipos. A Copa Deputación de Piraguismo, que conta de 6 regatas, organízase no marco da colaboración que a Vicepresidencia da Deputación de Lugo mantén coa Federación Galega de Piragüismo para a promoción deste deporte, ofrecendo aos clubs a posibilidade de participar en competicións federadas nas súas comarcas e contribuíndo así á consolidación de equipos de base.
Malia a intensa calor, o pavillón encheuse de público para gozar das actuacións das numerosas alumnas, que ofreceron exercicios individuais, por parellas e en grupo, destacando pola súa beleza e dificultade técnica ao ritmo da música escollida. Ao remate, a concelleira Ana Rubal entregou medallas ás participantes, que tamén agradeceron o traballo e os valores transmitidos pola súa monitora, Lorena Fernández. Lémbrase que a festa de clausura das Escolas Deportivas terá lugar o luns 29 ás 19:00 horas, nun acto conxunto co Concello de Alfoz, no que haberá diversas actividades de celebración e a entrega de diplomas.
A cantante e instrumentista asturiana Mónica Acevedo actuará en formato solista, mentres que o equipo do local ofrecerá un menú especial con pratos como o tartar de xarda, gañador do “Ribadeo Sabe”, gazpachuelo de tempada, lomo de sardiña con berenxena afumada, cóctel de lagostinos, bonito de Burela con melocotón asado e sopa de cebola, e solombo de porco celta con xudías tenras. A cita comeza ás 21:15, con prazas limitadas e reserva imprescindible.
A xornada incluíu tamén o IV Torneo de Pádel, que continuará durante a fin de semana. O evento, organizado polo Concello xunto con ASAPA e Miño Vivo e coa colaboración da Xunta, recupera unha iniciativa nacida hai catro anos a petición da mocidade, coa intención de consolidala no tempo. O tenente de alcalde, Marcos García Lombardero, destacou a alta participación —catro veces maior ca na primeira edición— e agradeceu a implicación de entidades, colaboradores e asistentes, así como a presenza de representantes da Xunta, do Parlamento e da Deputación.
Adultos, nenos, familias, grupos de amizades fixeron o percorrido nun día espectacular de sol e cunha temperatura de 26º á hora da saída. Acudiron á cita o presidente provincial da AECC, José Manuel Rozas, o alcalde de Ribadeo, Dani Vega, as concelleiras e concelleiro ribadenses, Marta Saiz, Begoña Sanjurjo, Elena Sierra e Francisco José Silvent, a presidenta e o xerente de Acisa, Carmen Cruzado e Jesús Pérez, así como representantes da AECC de Ribadeo coa súa presidenta, Tea Martínez, á cabeza. A II Andaina Ribadeo en marcha contra o cancro contou co patrocinio de Solán e Acisa Ribadeo e coa colaboración do Concello de Ribadeo, Eroski e 2M.
Foi unha xornada máxica na que a música e a convivencia se deron a man nunha contorna única. Os instrumentos de corda encheron de melodías os xardíns do centro, creando unha atmosfera especial que emocionou ao público asistente e puxo en valor o talento e a ilusión da mocidade. A alcaldesa de Cervo, Dolores García Caramés, non quixo perderse esta cita tan especial e desfrutou da tarde xunto ás persoas usuarias, e o persoal do centro. Durante o encontro, agradeceu o convite e felicitou á organización por promover actividades que fomentan a cultura, a inclusión e os espazos de encontro entre a veciñanza.
