Ribadeo, 12 de abril de 2018. O alcalde, Fernando Suárez, amósase molesto pola actuación que o Ministerio de Fomento está a realizar na N-642, entre Ribadeo e Porto, porque só se están a tapar as fochancas, e non todas, nesa estrada que é moi empregada polos veciños e veciñas que se desprazan a Vegadeo, á Pontenova, a Meira ou a Lugo. Suárez Barcia subliña que o Ministerio de Fomento ten moi esquecido Ribadeo, e lembra que a Ponte dos Santos segue sen luz, que o único que se fai na A-8 é tapar as continuas fochancas que se forman nesa vía, e que aínda están pendentes un acceso a Ribadeo desde esta autovía e outro desde a circunvalación. O alcalde pídelles “a eses deputadiños do PP” que en lugar de xestionar baches xestionen o que o Concello pediu por unanimidade con dereito e coa razón.
Fernando Suárez quixo hoxe “poñer de manifesto o desgusto do Concello de Ribadeo con esta actuación que está facendo o Ministerio de Fomento no senso de amañar parcialmente a estrada tan frecuentada N-642, entre Ribadeo e Porto, que dá servizo a moita xente que vai para Lugo pola estrada vella de Meira ou mesmo para A Veiga, para esta parte de Asturias occidental. A nosa sorpresa e o noso desgusto é porque hai varios meses, de maneira unánime, o Concello de Ribadeo pediulle ao Ministerio de Fomento que fixera o mesmo que fixo hai pouco tempo coa estrada desde Porto ata Lugo, que está moi ben amañada, moi ben aglomerada, en todo o seu ancho e en toda a súa extensión”.
O rexedor ribadense contou que “a nosa sorpresa é ao ver que agora toda esta parte da N-642, aquí debemos ser uns cidadáns de segunda, non debemos ter os mesmos dereitos que os outros veciños da provincia de Lugo, porque a nosoutros soamente nos tapan os baches máis grandes. Por exemplo para ir cara A Veiga nalgúns tramos os amañan, pero para vir da Veiga para Ribadeo non. Ademais molesta sobre maneira ver as actitudes destes lacayiños do PP, destes deputadiños, que parece ser que teñen moi pouco que facer no Parlamento galego, e andan xustificando que grazas a eles viñeron as máquinas tapar os baches, que isto se fixo polas súas xestións, e que ao mesmo tempo é unha primeira fase que algún día, será cando chova para arriba, se aglomerará de maneira enteira, cousa que me parece que non vai ser así”.
O alcalde de Ribadeo declarou que “a actitude que está mostrando o goberno do Estado con Ribadeo en moitos aspectos, e singularmente neste das infraestruturas, parece que aquí nesta esquina do norte da provincia de Lugo, lindando con Asturias, estamos un pouquiño esquecidos por parte do Ministerio de Fomento. Nin lles dá a gana de poñer a luz na Ponte dos Santos, seguen rebacheando a autovía A-8 como se fora no século XIX ao seu paso por Ribadeo porque segue habendo baches, o terceiro acceso da circunvalación que no seu momento se ía licitar suspendeuse e nunca máis se quixo facer, o terceiro acceso a Ribadeo desde a autovía segue pendente, a pesar de que o Congreso dos Deputados, a unha proposta do BNG de hai varios anos, votara unanimemente, e tantas e tantas outras cousas”.
Suárez Barcia pídelle “por favor estes deputadiños, lacayiños, que en vez de xestionar uns baches, que intenten xestionar o que o Concello de Ribadeo, de maneira unánime en todos estes casos, lle estivo pedindo con dereito e coa razón, e porque ademais non queremos ser máis que todos os nosos veciños, pero tampouco queremos ser menos”.
Fernando Suárez critica os rebacheos que está a realizar o Ministerio de Fomento na N-642, entre Ribadeo e Porto, e lembra os asuntos pendentes deste departamento co Concello: o alumeado da Ponte dos Santos ou os accesos á localidade desde a A-8 e desde a circunvalación
Relacionado
No acto intervirán o autor e Xoan Ramón Fernández Pacios, cronista oficial de Foz. A actividade está organizada pola Federación de Librarías de Galicia en colaboración co Concello de Foz.
O alcalde, Dani Vega, fixo un balance moi positivo: “foi un concerto moi especial nun marco espectacular, como é a igrexa parroquial de Ribadeo, e no que o gaiteiro Carlos Núñez encandilou aos asistentes co seu repertorio. Todos os asistentes disfrutámolo moito”. Xunto a Carlos Núñez estiveron o rexedor e as concelleiras de Cultura, Turismo e Seguridade, Begoña Sanjurjo, Marta Saiz e Montse Seijo.
Durante case dúas horas desenvolveuse unha conversa aberta arredor do mundo do espírito e do contido da obra, nun encontro ao que asistiu un grupo numeroso de persoas dispostas non só a escoitar, senón tamén a dialogar e compartir reflexións. Tras a intervención inicial de Pepe Peinó como responsable do proxecto, tomou a palabra o escritor Lionel Rexes, quen achegou novas perspectivas antes de abrir o debate ao público. As opinións, argumentos e matices sobre relixión, espiritualidade, Deus e os valores que sustentan a convivencia foron enchendo o espazo nun ambiente participativo e respectuoso, no que as diferenzas quedaron en segundo plano fronte á forza do diálogo, a solidariedade e o afecto.
Foron os propios implicados quen contactaron co 112 Galicia pasada a medianoite deste domingo. O vehículo no que viaxaban saíuse da vía na LU-132, en Cabarcos, Barreiros. A posición na que quedou o coche, inclinado sobre un terraplén, complicou o acceso dos profesionais de Urxencias Sanitarias de Galicia-061, por iso, os xestores do Centro Integrado de Artención ás Emerxencias de Galicia avisaron aos Bombeiros de Barreiros. Finalmente, só tiveron que rescatar a un dos dous ocupantes, o copiloto, e, para iso, tiveron que cortar os asentos. Do mesmo xeito, o equipo médico só trasladou a unha persoa.
A iniciativa xurdiu co obxectivo de xuntar o alumnado que coincidira na EGB, pero axiña se ampliou a todas aquelas persoas que compartiron pupitres e amizades tamén no instituto.
O público, totalmente entregado de principio a fin, amosouno cos intensos e prolongados aplausos que acompañaron toda a actuación. Ao remate, os asistentes expresaron o seu desexo de poder gozar no futuro de novos concertos do artista, que sen dúbida volverán entusiasmar ao público.
Na xuntanza preténdese analizar a execución das obras, o comportamento da empresa responsable, a problemática dos accesos durante as Festas de Xunqueira e solicitar ao Concello de Viveiro que faga público o proxecto definitivo.
