O PP de Ribadeo considera que o día previo ao inicio dunha longa ponte festiva non é a data apropiada para comezar as obras na rúa San Roque. Os populares din que o equipo de goberno debería buscar aparcamentos alternativos dado o número de prazas que se van suprimir

Ribadeo, 27 de abril de 2018. O Partido Popular de Ribadeo manifesta a súa satisfacción polo comezo das obras nas rúa San Roque, pero hoxe, venres, non considera que sexa o día máis apropiado para inicialas por ser a xornada previa ao inicio dunha longa ponte festiva. Ademais os populares botan en falta que, dado que se van suprimir moitas prazas de aparcamento, o equipo de goberno non buscara alternativas para estacionar antes de empezar as obras.
O portavoz do PP no Concello de Ribadeo, Jesús López Penabad, manifestou en primeiro lugar: “desde o Partido Popular alegrámonos de que por fin empecen as obras da rúa San Roque. Creo que é unha rúa que o merece e son moi necesarias”.
López Penabad engadiu que “se ve que empeza a campaña electoral en Ribadeo, porque despois de tantos anos deste goberno municipal por fin se ve algunha obra de calado nas rúas de Ribadeo, mellorando unha tan particular como é a rúa San Roque. Pero o que si nos gustaría puntualizar é que tendo unha ponte este fin de semana e os dous primeiros días da semana que vén non nos parece a mellor data para empezar a obra un venres, porque cremos que é de cara á galería. E dado que, como toda obra, é inevitable que provoque algunha molestia, empezar a semana que vén despois da ponte festiva sería máis que suficiente. Pero creo que o motivo é a propaganda que pretende facer o alcalde despois de moitos anos de pouco traballo en Ribadeo”.
O voceiro do PP dixo tamén que “o alcalde está presumindo de que se fai con fondos propios, pero aquí estamos observando que o Catastrazo do ano pasado, tan gravoso para os ribadenses, así como a suba do IBI deste ano, empeza a notarse en Ribadeo. Polo tanto os fondos propios do Concello de Ribadeo son realmente dos impostos que se subiron a todos os ribadenses”.
Ademais Jesús López Penabad comentou: “botamos en falta que, dado que se van suprimir moitas prazas de aparcamento, que non se tomen medidas con respecto a isto. Hai un aparcamento alí moi próximo, na rúa Lazurtegui, onde non se lle fixo absolutamente nada. Eu creo que vai ser a saída máis natural e o aparcamento para a xente que tiña por costume estacionara na rúa San Roque. Botamos en falta que non se tome algunha medida e antes de empezar as obras debería terse pensado un pouco en aumentar as prazas de aparcamento porque en Ribadeo en xeral escasean, e máis en datas moi puntuais. Se nos imos quedar sen 50 prazas o mínimo que deberán facer é habilitar ou mellorar os aparcamentos que hai próximos e intentar conseguir algún máis. De todas formas esperamos que as molestias que sexan as mínimas posibles e alegrámonos moito de que empecen as obras”.