Irene Rico e Lara de la Huerga gañaron o III Certame do Mar que o organizou o Concello de Burela

Nota de prensa

IRENE RICO E LARA DE LA HUERGA SON AS GAÑADORAS DO III CERTAME DO MAR, QUE O ORGANIZOU O CONCELLO DE BURELA. OS PREMIOS SERÁN ENTREGADOS MAÑÁ.

Burela, 19 de abril de 2011. Mañá terá lugar a entrega de premios aos gañadores do III Certame do Mar, que organizou o Concello de Burela. Será ás 12 horas no salón de plenos.

Onte reuníase o tribunal do evento, formado por un profesor do IES Monte Castelo e por outro do IES Perdouro, “co fin de xulgar os traballos dos nenos que participaron neste certame que este ano estivo adicado ás vacacións”, segundo explica a concelleira do Mar, Remedios López.

Os gañadores son: en 5º e 6º de primaria Irene Rico Gómez de 11 anos do CEIP Vista Alegre co traballo Unha viaxe inesperada e en 1º e 2º da ESO Lara de la Huerga Díez de 14 anos do IES Monte Castelo con De Libia a Galicia: historia dun sono. En 3º e 4º da ESO o premio quedou deserto.

A edil de Mar lembra que “todos os nenos teñen un lote de libros por participar, os gañadores do relato recibirán traxes de neopreno para practicar deportes acuáticos no verán e entre todos os asistentes ao acto, que se desenvolverá mañá no Concello, sortearase unha PlayStation 3”. Os premios serán entregados por Remedios López Villar e polo alcalde, Alfredo Llano.