O BNG explica que Burela é agora o referente deportivo da Mariña e que aposta pola continuidade

Nota de prensa

BURELA É AGORA O REFERENTE DEPORTIVO DA MARIÑA E O BNG APOSTA POLA CONTINUIDADE DOS APOIOS AO DEPORTE DE BASE E AO DEPORTE PROFESIONAL

A política deportiva do BNG durante estes catro anos de goberno municipal orientouse a garantir o acceso á actividade físico-deportiva para todos os cidadáns e cidadás coa adecuada supervisión técnica, a promocionar e coordinar o tecido asociativo deportivo, a prestar unha especial atención ao deporte escolar e de base optimizando as infraestruturas existentes e a apoiar o deporte de competición como estímulo e complemento da actividade físico-deportiva.

Despois do abandono no que se atopaba o deporte na época do Partido Popular, apostamos dende o goberno municipal pola implicación de todos os sectores sociais (clubs, asociacións e colectivos deportivos) no deseño e desenvolvemento da política deportiva do concello coa creación das Escolas Deportivas Municipais, con persoal municipal cualificado e oferta gratuíta das actividades, e cos convenios cos clubs de fútbol, fútbol sala e baloncesto para a consolidación do deporte de base (aportamos máis de 200.000 € en catro anos para estes clubs).

Porque as apostas do BNG polo deporte de Burela son claras e en materia de instalacións xestionamos diante da Dirección Xeral do Deporte da anterior Xunta de Galiza unha importante aportación económica (180.000 €) para a mellora e ampliación do Pavillón Vista Alegre, construímos na Marosa o primeiro campo de herba artificial da Mariña, melloramos os pavillóns deportivos con novos equipamentos (grada móbil, megafonía nova, máis marcadores, canastras de minibasket, locais para almacéns…), melloramos o campo de fútbol da Marosa e o Pavillón Vista Alegre con placas térmicas e fotovoltaicas para o aforro enerxético e construímos unha pista de pádel na Marosa.

Pero aínda podemos facer máis e o BNG aposta tamén pola construción dun novo complexo deportivo, polo impulso ao porto deportivo en Burela, pola mellora do pavillón dos Castros e pola consolidación de deportes máis minoritarios que se están desenvolvendo no noso concello e que apoiamos decididamente nestes catro anos de goberno municipal (ximnasia rítmica, artes marciais, ciclismo, motociclismo…), ademais de continuar e ampliar a oferta deportiva das Escolas Municipais e de consolidar os convenios deportivos cos clubs.