O consello da Xunta aprobou o plan de emerxencia exterior do embalse de lodos vermellos de Alcoa

Nota de prensa

O CONSELLO DA XUNTA APROBA O PLAN DE EMERXENCIA EXTERIOR DO DEPÓSITO DE LODOS VERMELLOS DE ALCOA

O Consello da Xunta aprobou hoxe o decreto do Plan de Emerxencia Exterior do depósito de lodos vermellos de Alcoa, que recibiu o informe favorable na Comisión Galega de Protección Civil, na última reunión do 31 de xaneiro. O obxecto do Plan é a organización das actuacións que deben ser desenvoltas no caso de rotura dun dos diques con que conta o depósito de lodos vermellos, co obxecto de minimizar os efectos dun posible accidente no ambiente. Este depósito de lodos vermellos serve de almacén de residuos sólidos, xerados do proceso de produción da fábrica de Alúmina a partir da bauxita.

O deposito esta formado por dous diques de materiais soltos, e o vaso de lodos. É un deposito mineiro notablemente instrumentado e non existe ningunha presa nin dique augas arriba. O dique principal está formado por un núcleo principal de sábrego construído en sucesivos recrementos ata a cota máxima prevista de 100 metros. O dique de cola é un dique drenante formado por un corpo de sábrego e un tacón de escolleira para garantir a estabilidade ao esvaramento deses diques

O Plan de Emerxencia Exterior de lodos vermellos contén o obxecto e o ámbito do Plan, o contorno das instalacións, as bases e criterios de planificación, a definición e planificación das medidas de protección, a estrutura e organización dos grupos que actuarán no caso de emerxencia, a operatividade do Plan en que se definen os distintos escenarios da emerxencia, conexión con outros Plans, e implantación e mantemento do plan de emerxencia.

A fábrica de Alcoa en Xove está afectada polo RD 975/2009, do 12 de xuño sobre xestión de residuos das industrias extractivas e de protección e rehabilitación do espazo afectado por actividades mineiras, que establece a obrigatoriedade de dispor dun plan de emerxencia exterior naquelas instalacións de residuos mineiros que estean clasificadas como A.

Os plans de emerxencia exterior son elaborados pola Xunta de Galicia e teñen como obxectivo determinar os posibles riscos destas instalacións industriais e ter preparada a resposta adecuada para minimizar as consecuencias en caso de producirse un accidente. Unha vez sometidos ao informe da Comisión Galega de Protección Civil, son homologados pola Comisión Nacional de Protección Civil, e aprobados, como é o caso deste Plan de Emerxencia Exterior do depósito de lodos vermellos, polo Consello da Xunta de Galicia.

OUTRAS NOVAS DE INTERESE:

CONSELLERÍA DO MEDIO RURAL E DO MAR

Proxecto de Lei de montes de Galicia

CONSELLERÍA DE PRESIDENCIA, ADMINISTRACIÓNS PÚBLICAS E XUSTIZA

Acordo polo que se autoriza a adquisición de compromisos de gasto de carácter plurianual derivados da Resolución pola que se convocan para o ano 2012 as axudasperiódicas de apoio a mulleres que sofren violencia de xénero.

CONSELLERÍA DE TRABALLO E BENESTAR

Informe polo que se dá conta ao Consello da Xunta do proxecto de orde pola que se establecen as bases que regulan as axudas e subvencións para o fomento do emprego a través dos programas de cooperación no ámbito de colaboración cos órganos e organismos das administracións públicas distintas da local, u niversidades eentidades sen ánimo de lucro e se procede á convocatoria para o ano 2012.

Informe polo que se dá conta ao Consello da Xunta de Galicia do proxecto de orde pola que se establecen as bases que regulan as axudas e subvencións para o fomento do emprego a través dos programas de cooperación no ámbito de colaboración coas entidades locais e se procede á convocatoria para o ano 2012.