A Deputación convoca o I Concurso de Novos Deseñadores para potenciar este sector e o emprego xuvenil

A Deputación convoca o I Concurso de Novos Deseñadores da provincia para potenciar este sector e o emprego xuvenil

– O organismo provincial organiza este pioneiro certame, dirixido a mozos de 18 a 35 anos de idade e censados en Lugo, no marco da gala Lvcvs Moda 2012

– Regina Polín anunciou que as inscricións poden facerse dende mañá entregando no Rexistro de San Marcos os bocetos dos deseños, que deberán estar inspirados, polo menos un deles, no medio ambiente, en homenaxe ó 10º aniversario da Reserva Terras do Miño

– Haberá tres premios en metálico -de 500, 300 e 200 euros- e os gañadores daranse a coñecer durante a gala de moda, que terá lugar o día 8 de maio no Círculo das Artes

A Deputada de Artesanía e Deseño, Regina Polín, presentou este luns o I Concurso de Novos Deseñadores da provincia, convocado pola Deputación “co obxectivo de fomentar os novos valores no deseño de moda, así como potenciar a industria deste sector e, principalmente, o emprego xuvenil”. Polín subliñou neste sentido que a firme aposta do organismo provincial por facilitar a entrada dos máis novos no mundo laboral é “real e visible en iniciativas como as 70 becas Leonardo da Vinci que darán a oportunidade a mozos titulados lucenses de formarse en Europa, as primeiras bolsas medioambientais, que insertaron laboralmente a preto da metade dos participantes, as becas de innovación ou as de artesanía”.

O organismo provincial convoca o pioneiro certame de novos creadores para reforzar a Gala Lvcvs Moda 2012, que terá lugar o vindeiro 8 de maio no Círculo das Artes da capital lucense, segundo anunciou a Deputada de Deseño e Artesanía. O concurso está dirixido a mozos de entre 18 e 35 anos de idade, residentes e censados en Lugo, e os interesados en participar poderán inscribirse a partir de mañá, día 10, e ata o 20 de abril entregando no Rexistro do Pazo de San Marcos, ben persoalmente ou por correo, os bocetos dos seus deseños. Estes deberán ser orixinais e inéditos, e estar inspirados, polo menos un deles, no medio ambiente, en homenaxe ó 10º aniversario da declaración da Reserva da Biosfera Terras do Miño pola UNESCO. Haberá tres premios en metálico –de 500, 300 e 200 euros – e o nome dos gañadores farase público durante a celebración da gala de moda, que cumpre a súa terceira edición.

Para a concesión dos premios, teranse en conta, por esta orde, os criterios de orixinalidade, calidade e creatividade dos deseños presentados; a inspiración da colección no medio ambiente; e a presentación dos traballos.

Outros requisitos

O formulario de inscrición e as bases do concurso poden atoparse na web da Deputación www.deputacionlugo.org pero outros requisitos fundamentais son os seguintes:

I. Cada aspirante presentará baixo pseudónimo unha única colección composta por tres modelos. O tema de inspiración será o décimo aniversario da declaración de Terras do Miño como Reserva da Biosfera, polo que primará a inspiración no medio ambiente. Un modelo da colección deberá estar listo o 7 de maio para proceder á súa proba antes da gala Lvcvs Moda, que terá lugar ó día seguinte, o 8 de maio.

II. As persoas participantes presentarán os seus bosquexos debuxados de fronte e costas en formato DIN A/4. Ao dorso de cada bosquexo deberá figurar obrigatoriamente o título da colección, o do deseño -se o houbera- e o pseudónimo da persoa concursante.

III. As láminas deberán ir acompañadas dunha descrición técnica do modelo e, opcionalmente, de mostras de material a utilizar na súa confección. A ficha técnica, que deberá axustarse como mínimo á talla 38 de muller e 40 de home, conterá, polo menos, os seguintes puntos: bosquexo con todas as características do modelaxe; bandeiras de cores; proposta de moda e tecidos; medidas a escala; e ficha de escandallo. Así mesmo, poderá achegarse á ficha técnica calquera outra documentación que se considere relevante de cara á avaliación do proxecto.

Por outra banda, nas solicitudes deberase indicar un número de teléfono ou correo electrónico ao que se deberán cursar as comunicacións que deban realizarse, que servirá a todos os efectos como medio de practicar as notificacións. Ademais, as solicitudes presentaranse xunto coa seguinte documentación, que terá que estar debidamente asinada polo solicitante e deberá ter carácter auténtico ou copias compulsadas conforme á lexislación vixente:

– Documentación acreditativa da identidade, idade e residencia do solicitante.

– Currículum vitae da persoa que participa no concurso.

– Os bosquexos e as fichas técnicas presentaranse nun sobre pechado co título da colección e o pseudónimo.

– Declaración xurada de que a colección presentada é orixinal e non resultou premiada nin presentada noutro concurso.

Remitido