Cultura e Educación presenta ao alcalde de Burela o proxecto da Rede de Dinamización Lingüística
O secretario xeral de Política Lingüística visitou hoxe a localidade mariñá para reunirse co alcalde, ao que lle presentou o proxecto da Rede de Dinamización Lingüística da Xunta de Galicia
Valentín García participou tamén nunha sesión de dinamización lingüística organizada polo IES Perdouro e tivo ocasión de coñecer de primeira man as liñas de traballo que están a desenvolver desde este centro educativo no marco do ‘Proxecto Burela’
A Consellería Cultura, Educación e Ordenación Universitaria presentou hoxe ao alcalde o proxecto da Rede de Dinamización Lingüística que a Xunta de Galicia puxo a andar en setembro de 2010 e que a día de hoxe conta xa con preto de 120 entidades adheridas. Para iso o secretario xeral de Política Lingüística, Valentín García, desprazouse hoxe ata Burela, onde mantivo unha xuntanza con José González Barcia, alcalde da localidade.
Logo do encontro, o secretario xeral e o alcalde achegáronse ao IES Perdouro, para coñecer en profundidade o desenvolvemento do programa de integración intercultural “Modelo Burela”, impulsado desde a súa Área de Innovación Educativa, en colaboración con outros centros educativos da Mariña Lucense e tamén co Concello de Burela, que conta cun Proxecto de Planificación Lingüística.
O director do centro educativo, Juan G. Sama, a coordinadora da Área de Innovación Educativa, María José Andión Fontela e o profesorado implicado no Proxecto de Innovación Educativa deste centro expuxéronlle polo miúdo ao secretario xeral as iniciativas de dinamización lingüística que se están a desenvolver desde o centro, en colaboración con outras entidades do tecido social burelao.
García Gómez tamén tivo ocasión de coñecer persoalmente o funcionamento do programa de actividades do Ciclo Formativo de Desenvolvemento de Produtos Informáticos.
Sesión didáctica arredor da dinamización do galego
A sesión didáctica, na que participou García Gómez acompañado do alcalde de Burela, así como do profesorado e alumnado dos centros educativos da localidade burelá, estivo dirixida pola profesora Margarita López e incluíu visitas a diversas entidades comerciais. A primeira parada foi nos locais do Ximnasio Breogán, onde a comitiva puido dar conta en primicia dos primeiros resultados da montaxe dun videoclip de homenaxe ao célebre grupo musical “Os Resentidos”, no marco dun produto musical recompilatorio de dous grupos musicais da Mariña Luguesa –a Orquestra Alma Latina (Burela) e Safari Orquestra (Lourenzá)- que proximamente se presentará ao público xeral en diversas localidades galegas.
Logo de percorrer outros negocios e para concluír a sesión, García Gómez e o resto dos participantes mantiveron un encontro cos responsables da Asociación de Comerciantes, Industriais e Austónomos (ACIA) local, que lle trasladaron ao secretario xeral os seus proxectos e lle fixeron entrega dun arquivo recompilatorio con mostras das numerosas actividades realizadas pola devandita asociación dende que foi revitalizada.
‘Proxecto Neo‘
No marco do “Proxecto Burela“ desenvólvese, desde o mes de xaneiro, „Proxecto Neo“, a nova iniciativa radiofónica sobre a lingua galega impulsada desde o IES Perdouro, en colaboración con Radio Burela. O programa, que se centra na integración lingüística das persoas neofalantes, emítese cada mércores en horario de 17:00-18:00 horas e está dirixido e conducido por Bernardo Penabade, profesor de Lingua galega e literatura no instituto burelao e coordinador do “Modelo Burela“. Tamén conta con emisión a través de Internet e con presenza nas redes sociais.
O ‘Modelo Burela‘
O coñecido “Modelo Burela” de Planificación Lingüística constitúe xa todo un referente no ámbito da dinamización lingüística no ensino. O IES Perdouro botou a andar o proxecto no curso académico 2005-2006 e foi precisamente no presente curso 2011-2012 un dos cinco aos que a Consellería de Cultura, Educación e Ordenación Universitaria –a través da Secretaría Xeral de Política Lingüística- lles outorgou cadanseu premio de innovación en dinamización lingüística, no marco da convocatoria anual de Cultura e Educación dirixida ao fomento do desenvolvemento de proxectos educativos innovadores que impliquen o uso da lingua galega e o coñecemento da cultura de Galicia.
O “Modelo Burela” busca dinamizar a lingua galega desde a adquisición da competencia lingüística do alumnado en tres idiomas: galego, castelán e unha terceira lingua internacional. Durante este curso académico, o proxecto chega aos seis cursos en desenvolvemento e dá novos pasos coa posta en marcha iniciativas dinamizadoras no comercio e na empresa local.
GONZÁLEZ BARCIA ASEGUROU QUE O GALEGO ESTÁ IMPLANTADO DESDE HAI ANOS NO CONCELLO DE BURELA E SUBLIÑOU QUE “ESTAMOS A CUMPLIR ESCRUPULOSAMENTE COA LEI DE NORMALIZACIÓN LINGÜÍSTICA”.
Burela, 30 de abril de 2012. O alcalde de Burela, José María González Barcia, asegurou esta tarde que o galego está implantado desde hai anos en todas as tarefas administrativas que se realizan no Concello. E valorou de xeito positivo a visita cursada esta tarde a Burela polo secretario xeral de Política Lingüística, Valentín García.
O rexedor agradecéulle ao secretario xeral de Política Lingüística a súa visita a Burela “porque demostra o apoio deste departamento da Xunta á labor que o Concello de Burela ven desenvolvendo desde que se segregou de Cervo. Refírome ao uso do noso idioma durante todo este tempo, todas as tarefas administrativas que se levan a cabo no Concello, comunicacións, edictos, bandos, decretos da Alcaldía, actas, etc, están en galego. Eso quere decir que nós estamos a cumplir escrupulosamente coa lei de normalización lingüística”.
González Barcia explicou que “ademáis deso un bó número dos volumes da biblioteca municipal están en galego, unha porcentaxe moi alta. E desde a Concellería de Educación e Cultura se potencia o emprego do galego en todos aqueles certames e concursos que se convocan. Esto é un bó sinal”. E engadiu que “nós no caso de dirixirnos a persoas que non coñecen o galego, tanto a nivel político como dos funcionarios que atenden aos cidadáns no Concello, empregamos a lingua castelán. O galego é a lingua vehicular no Concello de Burela, pero nos casos nos que as persoas que veñen non dominan a nosa lingua empregamos o castelán”.
O alcalde de Burela espera e confía “en que esta visita sirva para poñer en marcha algunha actividade entre a Secretaría Xeral de Política Lingüística e o Concello de Burela, reforzar os lazos xa existentes e desta forma poder seguir fomentando o emprego da nosa lingua respectando a lei de normalización lingüística e todo o que trae consigo”.
Remitido
————————————
O SECRETARIO XERAL DE POLÍTICA LINGÜÍSTICA FAI UN “CHEQUEO” AO MODELO BURELA
Valentín García participará nunha sesión de dinamización lingüística e reunirase cos diversos sectores sociais implicados nesta iniciativa cultural
O Secretario Xeral de Política Lingüística da Xunta de Galicia visitará Burela para coñecer en profundidade o desenvolvemento do programa de integración intercultural “Modelo Burela”, impulsado pola área de innovación educativa do Instituto Perdouro, en colaboración con outros centros educativos da Mariña e co propio Concello de Burela, que aprobou un Proxecto de Planificación Lingüística en abril de 2008.
O próximo luns, día 31 de abril, Valentín García Gómez será recibido ás 16:00 horas no Instituto Perdouro polo director do centro, Juan G. Sama, e pola coordinadora da área de innovación, María José Andión Fontela. Seguidamente coñecerá persoalmente o profesorado implicado no Proxecto de Innovación Educativa, que recibiu por quinta vez consecutiva un dos premios outorgados pola Consellería de Educación en colaboración con Política Lingüística e que este ano traballa no impulso do comercio e a empresa locais.
No propio IES Perdouro, o Secretario Xeral coñecerá en directo funcionamento do programa de actividades do ciclo formativo de Desenvolvemento de Produtos Informáticos, en cuxos contidos curriculares está plenamente conseguida a normalización lingüística. A sesión didáctica estará dirixida pola profesora Margarita López Periago, que participa activamente no Proxecto Neo, dedicado á integración das persoas neofalantes.
Fóra do recinto escolar, Valentín García visitará diversas entidades comerciais da localidade, acompañando unha sesión de dinamización lingüística realizada por profesorado e alumnado dos institutos de Burela. A primeira parada (sobre as 16:45) será nos locais do Ximnasio Breogán, onde a comitiva poderá visualizar en primicia os primeiros resultados da montaxe dun videoclip de homenaxe ao célebre grupo musical “Os Resentidos”, un produto musical que recolle traballos de dous grupos musicais da Mariña -Orquestra Alma Latina (Burela); e Safari Orquestra (Lourenzá)- e que proximamente se presentará ao público xeral en diversas localidades galegas.
A xornada finalizará (por volta das 17:30 horas) co encontro dos participantes na sesión educativa cos responsables da ACIA local, que aproveitarán para explicarlle os seus proxectos ao Secretario Xeral de Política Lingüística ao tempo que lle farán entrega dun arquivo que recolle mostras das numerosas actividades realizadas por esta asociación desde que foi revitalizada.
Remitido
Esta cita, xa consolidada dentro da programación estable do centro, permitirá ao público gozar dunha mostra do traballo artístico e formativo desenvolvido ao longo do curso polo alumnado da especialidade. A actividade constitúe unha oportunidade para achegar a danza á cidadanía e poñer en valor o esforzo, a dedicación e a evolución das alumnas e alumnos participantes.
O Concello destaca que este novo éxito é froito do compromiso, do esforzo e da dedicación constante do deportista, cualidades que lle permiten seguir acadando resultados destacados a nivel estatal. Desde a entidade municipal transmítense os parabéns a González Villares por este subcampionato de España.
A proba, organizada polo CP Altrúan, reuniu máis de 130 palistas dos seis clubs lucenses de augas tranquilas que participan na competición: o propio Altruán, o CD San Ciprián, o Club Kayak Foz, o CP Viveiro Urban Hotel, o Cidade de Lugo e o Club Fluvial de Lugo. O deputado de Mocidade Daniel García entregou os premios da proba, na que Club Fluvial de Lugo, Cidade de Lugo e Altruán coparon o podio por equipos. A Copa Deputación de Piraguismo, que conta de 6 regatas, organízase no marco da colaboración que a Vicepresidencia da Deputación de Lugo mantén coa Federación Galega de Piragüismo para a promoción deste deporte, ofrecendo aos clubs a posibilidade de participar en competicións federadas nas súas comarcas e contribuíndo así á consolidación de equipos de base.
Malia a intensa calor, o pavillón encheuse de público para gozar das actuacións das numerosas alumnas, que ofreceron exercicios individuais, por parellas e en grupo, destacando pola súa beleza e dificultade técnica ao ritmo da música escollida. Ao remate, a concelleira Ana Rubal entregou medallas ás participantes, que tamén agradeceron o traballo e os valores transmitidos pola súa monitora, Lorena Fernández. Lémbrase que a festa de clausura das Escolas Deportivas terá lugar o luns 29 ás 19:00 horas, nun acto conxunto co Concello de Alfoz, no que haberá diversas actividades de celebración e a entrega de diplomas.
A cantante e instrumentista asturiana Mónica Acevedo actuará en formato solista, mentres que o equipo do local ofrecerá un menú especial con pratos como o tartar de xarda, gañador do “Ribadeo Sabe”, gazpachuelo de tempada, lomo de sardiña con berenxena afumada, cóctel de lagostinos, bonito de Burela con melocotón asado e sopa de cebola, e solombo de porco celta con xudías tenras. A cita comeza ás 21:15, con prazas limitadas e reserva imprescindible.
A xornada incluíu tamén o IV Torneo de Pádel, que continuará durante a fin de semana. O evento, organizado polo Concello xunto con ASAPA e Miño Vivo e coa colaboración da Xunta, recupera unha iniciativa nacida hai catro anos a petición da mocidade, coa intención de consolidala no tempo. O tenente de alcalde, Marcos García Lombardero, destacou a alta participación —catro veces maior ca na primeira edición— e agradeceu a implicación de entidades, colaboradores e asistentes, así como a presenza de representantes da Xunta, do Parlamento e da Deputación.
Adultos, nenos, familias, grupos de amizades fixeron o percorrido nun día espectacular de sol e cunha temperatura de 26º á hora da saída. Acudiron á cita o presidente provincial da AECC, José Manuel Rozas, o alcalde de Ribadeo, Dani Vega, as concelleiras e concelleiro ribadenses, Marta Saiz, Begoña Sanjurjo, Elena Sierra e Francisco José Silvent, a presidenta e o xerente de Acisa, Carmen Cruzado e Jesús Pérez, así como representantes da AECC de Ribadeo coa súa presidenta, Tea Martínez, á cabeza. A II Andaina Ribadeo en marcha contra o cancro contou co patrocinio de Solán e Acisa Ribadeo e coa colaboración do Concello de Ribadeo, Eroski e 2M.
