O alcalde de Cervo contesta ás críticas da oposición sobre a asesora do concello co argumento de “ti tamén”

Villares considera que Estúa está desexando ser o único asesor que haxa no Concello de Cervo

Cervo, 2 de xuño de 2012-O alcalde de Cervo, Alfonso Villares, considera que o nacionalista Xosé Antón Estúa está desexando ser o único asesor que haxa no Concello de Cervo. Así explica o rexedor que o asesor do BNG na Deputación amose tanta preocupación pola renuncia de Pilar Álvarez e pola súa futura substitución por parte de Pilar Armada, asesora do executivo local.

“Sabemos que o asesor do BNG na Deputación está inquieto pola entrada de Pilar Armada no goberno municipal” asegura Villares, “xa que o nacionalista sempre quixo ser o único asesor que houbese no Concello de Cervo, e os seus celos eran máis que evidentes”. Para Villares “o asesor do BNG non tiña que desacougarse, xa que aínda que non fora o único asesor, si podía ser único en moitas outras cousas” como por exemplo “en ser asesor dunha administración como a Deputación, da que o BNG sempre renegou e reclamou repetidamente a súa desaparición”.