A Xunta achegará información sobre diferentes axudas e servizos para emprendedores

ECONOMÍA E INDUSTRIA ACHEGARÁ OS APOIOS DA XUNTA PARA NOVOS INVESTIMENTOS E MELLORA COMPETITIVA NO ENCONTRO INTERNACIONAL COOPERATIVO

 O Igape informará sobre os programas como o re-Emprende, re-Imaxina e re-Acciona, activados en datas recentes para facilitar a atracción de novos investimentos e a implantación de servizos avanzados para mellorar a competitividade empresarial

 Este encontro celebrase tamén co obxectivo de xerar máis e mellores empregos, mediante o asesoramento dos axentes vinculados á promoción do cooperativismo

Santiago, 4 de xullo de 2012.- A Consellería de Economía e Industria achegará información sobre as diferentes axudas e servizos habilitados coa fin de apoiar os novos investimentos ou as iniciativas para facilitar a mellora da competitividade ou a internacionalización das empresas aos asistentes ao Encontro Internacional Cooperativo que se desenvolve, a partir de mañá, 5 de xullo, no Palacio de Congresos de Santiago.

A través dun espazo habilitado para o Instituto Galego de Promoción Económica, a Consellería de Economía e Industria achegará información detallada sobre os diferentes servizos e axudas a disposición dos promotores de actividades empresariais, incluídas as cooperativas, en Galicia. Este encontro celebrase tamén co obxectivo de xerar máis e mellores empregos, mediante a realización de accións de asesoramento, formación e información dos diferentes axentes vinculados á promoción do cooperativismo e da economía social.

En concreto, responsables do Igape facilitarán durante o desenvolvemento deste evento internacional información sobre as liñas de apoio que están abertas na actualidade á presentación de solicitudes, como por exemplo a liña de apoio a grandes investimentos; o programa re-Emprende, para apoiar novos investimentos de novas pemes ou emprendedores, e o re-Imaxina, para apoiar investimentos de microempresas, novas pemes ou empresas que desexan mellorar a súa competitividade.

O Igape achegará igualmente información sobre o novo programa re-Acciona, que está impulsando para facilitar a prestación de servizos avanzados orientados a facilitar a mellora da competitividade das pemes; e sobre os servizos e apoios existentes para facilitar a internacionalización das empresas galegas.

O encontro organizado pola Consellería de Traballo desenvolverase, o 5 e 6 de xullo, baixo o lema “As cooperativas axudan a construír un mundo mellor”. Enmarcase nas actividades divulgativas e formativas do proxecto europeo COOPERA+, cofinanciado polo Programa De Cooperación Territorial España – Portugal 2007 -2013, que articula medidas que contribúan ao fomento e consolidación das cooperativas na Eurorrexión Galicia Norte de Portugal.