O porto de Celeiro acolleu a primeira xornada da I Bandeira de Traiñeiras na que compiten 17 embarcacións

O PORTO DE CELEIRO ACOLLEU A PRIMEIRA XORNADA DA I BANDEIRA DE TRAIÑEIRAS DEPUTACIÓN DE LUGO

Antonio Veiga, que asistiu ao evento, explicou que “este tipo de actividades, ademais do valor que teñen como eventos a nivel deportivo, aportan un valor engadido que é a afluencia de xente á localidade co gallo da súa celebración”

Un total de 17 embarcacións participan nesta competición , coa que a nova directiva do club de remo pretende revitalizar este deporte na comarca

Celeiro – Viveiro, 7 de xullo de 2012. O porto de Celeiro acolleu a primeira xornada da I Bandeira de Traiñeiras Deputación de Lugo, á que asistiu o vicepresidente do ente provincial e responsábel das áreas de Benestar Social e Deporte, o nacionalista Antonio Veiga, que declarou que “este tipo de actividades, ademais do valor que teñen como eventos a nivel deportivo, aportan un valor engadido que é a afluencia de xente á localidade co gallo da súa celebración, pois son moitas as persoas que se achegaron a Celeiro esta fin de semana para asistir ao evento”.

Esta primeira xornada consistiu en dúas quendas contrarreloxo conformadas polos 9 equipos da LG-B na 1ª quenda, dos que quedou gañador o Amegrove, e os 8 equipos da LG-A na 2ª quenda, dos que quedou primeiro o Robaleira , ó que Antonio Veiga entregou o maiot de campión desta proba.

As doce embarcacións clasificadas, das 17 participantes, disputarán mañá, a partir das 11:00 horas, a final da I Bandeira de Traiñeiras Deputación de Lugo, mediante o sistema tradicional de regatas, en 3 quendas segundo os resultados da xornada de hoxe, independentemente da liga a que pertenzan os equipos. Deste xeito, a proba de hoxe é puntuábel para cada unha das ligas, posto que non hai interferenza entre elas, e a xornada de mañá, definirá a clasificación e reparto de premios da bandeira en cuestión.