A delegada da Xunta di que é importante atopar unha solución axeitada que proporcione estabilidade para Alcoa

RAQUEL ARIAS SUBLIÑA O COMPROMISO DA XUNTA CON ALCOA E REITERA O PROPÓSITO DE “ATOPAR A SOLUCIÓN QUE PROPORCIONE ESTABILIDADE A LONGO PRAZO”

 A delegada territorial sinala que a Xunta de Galicia segue a traballar por atopar unha solución ao problema da tarifa eléctrica, “continuando coas xestións iniciadas tanto coa empresa como co Ministerio de Industria”

 Lembra que o propio presidente da Xunta se involucrou nesta cuestión porque Alcoa é “irrenunciable” para A Mariña e para a provincia de Lugo polo seu papel fundamental na actividade económica

Cervo, 30 de agosto de 2012.- A delegada territorial, Raquel Arias, reiterou hoxe o compromiso da Xunta coa permanencia de Alcoa na Mariña, e asegurou que o Goberno galego continúa realizando as xestións precisas tanto coa empresa como co Ministerio de Industria para lograr unha solución ao problema da tarifa eléctrica da factoría.

No marco dunha visita institucional á comarca da Mariña, Arias incidiu en que “o importante agora é atopar unha solución axeitada que proporcione estabilidade á factoría de Alcoa na Mariña a longo prazo”, evitando “improvisar medidas de curto alcance que non resolverían definitivamente a cuestión”.

Raquel Arias lembrou que “a Xunta e o seu presidente traballan dende o primeiro momento neste tema”, xa que a factoría mariñá de Alcoa é “irrenunciable” polo seu papel fundamental na actividade económica da provincia.

“Dende o Goberno galego insistiremos na necesidade dunha tarifa diferenciada para grandes clientes como Alcoa –afirmou-, ao tempo que abordamos outras actuacións de apoio directo á planta, como o impulso ao gasoducto ou investimentos que a axuden a ser máis competitiva”.