Luns comeza o torneo internacional de volei-praia “Bitter Kas” Praia da Pasada en San Miguel de Reinante

O torneo internacional de volei-praia “Bitter Kas” Praia da Pasada, dará comezo este luns á 4 da tarde

Tras o inesperado fracaso no torneo de Foz, os afeccionados ao volei-praia da praia da Pasada (San Miguel de Reinante), organizan un ano máis o Torneo Internacional “Bitter Kas” Praia da Pasada. A competición, que se disputará nas tardes do luns 13 e martes 14 de agosto no areal barreirense, dará comezo o luns ás 16 horas, momento no cal se realizará a inscrición. O vixente campión, Javier Reigosa, defenderá o seu título formando parella co que será o principal atractivo do evento, Roberto Casas, que aos seus 26 anos está desplegando o seu mellor volei, se ben non se atopa en plenitude de forma. A parella, que chega coa moral un tanto tocada despois de fracasar no intento de convertir a Reigosa en Pentacampión do torneo focense, terá un dos seus principais rivais no equipo formado por Juanjo Lacasta e Luna Lacasta, que despois de firmar unha discreta actuación en Foz, e coa incorporación de Rulo Alonso, chegan con ánimos renovados á cita da Pasada. Tamén se agarda a participación de varios equipos estranxeiros, principalmente portugueses e brasileiros, entre os que destaca o equipo carioca capitaneado por Carlinhos, que se postula como a principal alternativa para o cambio de ciclo, unha vez confirmada a ausencia da dupla formada por Rodrigo e Guillermo Avendaño. Trátase dunha ausencia destacada, xa que esta parella viña de facer unha pretemporada moi esixente, encamiñada expresamente a afrontar a loita por este título, o que facía que se mostrara moi confiados nas súas posibilidades, como demostran as últimas declaración de Guillermo: “Yo siempre creí en mi volei”. A pesar desta ausencia de última hora, agárdase vivir momentos de volei-praia de alto nivel e convídase a calquera que estea interesado/a en participar a que se achegue á praia da Pasada, o vindeiro luns día 13 ás 4 da tarde, para formalizar a inscrición.