A asociación Arrincadeira de Riotorto organiza unha exposición de fotos na feira da Augaxosa

As tradicionais feiras da Augaxosa teñen varios séculos de existencia. Quizais xa na Idade Media se desenvolveron feiras na campela do Chao Grande. No Catastro de Ensenada da parroquia da Muxueira (1752) dise “…asimismo se hace una feria, el día veintiséis de cada mes, en la que se venden y compran ganados de diversas especies, granos, comestibles, herraga (?) y otras menudencias de las que produce este país, sin que por unas y otras se cobre tributo alguno…”. Nunha acta do Concello de Mondoñedo do ano 1787 dise que a feira da Augaxosa se celebra “el día 26 de cada mes (…) desde tiempo inmemorial”. Sabemos que ata 1939 ou 1940 aínda se facía unha feira o 14 de setembro. Era anual e a ela asistían gandeiros de diversos lugares, o mesmo da Mariña que das comarcas de Miranda, de Taramundi, A Fonsagrada e A Terra Chá, Lourenzá e O Valadouro, para comprar e vender as súas reses, tanto de cabalar como de vacún e o mesmo ovellas que cabras; tamén asistían vendedores de froitas e viandas. Durante o resto do ano as feiras e mercados facíanse todos os meses o 14 e o 26; eran na vila, alí vendíase de todo. A ela acudían ferradores de Riotorto e A Pastoriza; oleiros de Mondoñedo; tratantes de gando ovino de Meira, Carballido (A Fonsagrada) e Trabada; tratantes de porcos de Santiso de Abres; un comerciante de San Pedro de Bogo e un caldeireiro de San Tomé de Lourenzá. A maioría dos tendeiros ou “lenceiros”, como os chamaban, tiña unhas casetas de pedra e lousa co seu mostrador; uns poucos, en bo arranxo, compartíana con outro, e algúns tiñan varias que as cedían en arrendamento a outros. Nestas feiras e mercados eran moi frecuentes as liortas entre os tratantes de gando, como tamén entre os comerciantes e outros que se agregaban, chegando a haber feridos graves en moitas ocasións.