O BNG acusa a Xunta de cometer un xenocidio conra a identidade cultural do país

ERMIDA ACUSA Á XUNTA DE COMETER UN XENOCIDIO CONTRA A IDENTIDADE CULTURAL DO PAÍS

A candidata do BNG denuncia o medo do Partido Popular á cultura participativa e recorda que o Goberno de Núñez Feijóo suprimiu a liña de axudas ás asociacións culturais

Os nacionalistas apostan por “unha sociedade organizada ao redor dun tecido asociativo forte que estude e difunda a cultura galega”

Burela, 29 de setembro de 2012. Unha delegación do Bloque Nacionalista Galego encabezada pola candidata ás eleccións autonómicas do vindeiro 21 de outubro, Ana Ermida, mantivo un encontro con representantes do eido cultural da comarca para coñecer as súas demandas e valorar a política da Xunta de Galiza neste eido durante a lexislatura que vén de rematar.

Durante a xuntanza, Ermida explicou que “cultura e asociacionismo deben camiñar xuntos. A democracia require dunha sociedade organizada ao redor dun tecido asociativo forte e con recursos que poida realizar desde estudos até todo tipo de actividades coas que manter viva e difundir a cultura do país, algo que xa sabemos que molesta e desgusta ao Partido Popular”.

Ermida acusou ao presidente en funcións e candidato á reelección, Núñez Feijóo, de cometer “un auténtico xenocidio contra a identidade cultural do país cos reiterados e deliberados ataques á lingua galega de acordo a posicionamentos ideolóxicos que consideran a Galiza como un pobo de segunda e que tratan de mermar a súa autoestima; un xenocidio contra o patrimonio, como se demostra co abandono do Castro da Atalaia en San Cribrao e doutros xacementos da comarca da Mariña, e un xenocidio contra os creadores e xeradores de cultura”.

Dende as filas nacionalistas consideran que as iniciativas culturais son o primeiro paso para establecer unha imaxe e unha marca de país que nos diferencie. “A cultura é un dos grandes valores de Galiza que, ademais, permite ter un perfil propio e adecuado para amosar no exterior”.

A candidata sinalou que “o Partido Popular é o primeiro atranco para logralo porque todas as súas políticas son contrarias ao fomento do asociacionismo e a promover a cultura galega. Os populares sempre se mostraron galegofóbicos e a súa chegada ao Executivo autonómico supuxo a supresión da liña de axudas en concorrencia competitiva paras asociacións culturais, obrigándoas a reflexionar e redobrar esforzos para frear as consecuencias da terrorífica axenda neoliberal dos gobernos de Rajoy e Feijóo, que temen á cultura participativa”.

Pola súa banda os representantes culturais que acudiron á xuntanza reclamaron máis liñas de subvencións e axudas para a realización e difusión de actos e mellores dotacións para os locais onde desenvolven as súas actividades.