Dende a chegada do PP á Xunta o número de parados incrementouse un 51,53% en Cervo, en máis dun 35% na Mariña, asegura o BNG

ERMIDA DENUNCIA QUE O GOBERNO DE FEIJÓO PASARÁ Á HISTORIA DE GALIZA POR SITUAR A TAXA DE DESEMPREGADOS EN MÁXIMOS HISTÓRICOS

Dende a chegada do Partido Popular á Xunta o número de parados incrementouse un 51,53 por cento en Cervo, en máis dun 35 por cento na Mariña e un 72 por cento en todo o país

“As políticas dos executivos populares son asfixiantes para os traballadoras e traballadoras, crean máis paro, máis pobreza e recortan dereitos”

O BNG comprométese a reducir a temporalidade, a crear emprego estábel e a restaurar os dereitos laborais

Cervo, 4 de outubro de 2012. A candidata número tres do Bloque Nacionalista Galego por Lugo, Ana Ermida, participou, esta mañá, nun novo acto da campaña ‘Futuro para A Mariña’ no que denunciou as ‘nefastas’ consecuencias das reformas do Partido Popular que están a provocar un “incremento exponencial do número de desempregados”.

Durante o encontro con veciños e veciñas de San Cibrao, Ermida explicou que “na etapa do Goberno de Feijóo superouse, por primeira vez na historia deste país, o 20 por cento de paro. Pero non só houbo un incremento significativo de desempregados senón que esta tendencia alcista é aínda máis desfavorábel en Galiza que no conxunto do Estado. Núñez Feijóo, como presidente en funcións e candidato á reelección polo Partido Popular, debería explicar os motivos polos que, trala súa promesa de 2009 de rematar co desemprego e a crise en 45 días, a taxa de paro incrementouse até un 72 por cento en todo o país e un 51,53 por cento en Cervo. Na comarca da Mariña, dito incremento superou o 35 por cento chegando até preto de 5.000 parados, cifra que pode aumentar drasticamente se non se soluciona o problema da tarifa eléctrica de Alcoa”.

A candidata nacionalista tamén chamou a atención sobre as consecuencias da reforma laboral aprobada hai seis meses polo Goberno de Rajoy; “tempo no que non houbo ningún indicador económico ou social positivo: reduciuse o número de contratacións, aumentou o desemprego, os salarios baixaron, a flexibilidade laboral e os convenios colectivos practicamente desapareceron. Na provincia de Lugo, dende marzo, os contratos temporais ascenderon un 51 por cento, o que redunda aínda máis na precariedade laboral dos traballadores e traballadoras. A reforma laboral de Rajoy só pode tildarse de auténtico fracaso”.

“O Partido Popular –continuou Ermida- pasará á historia por marcar un antes e un despois na perda de dereitos dos asalariados e asalariadas. Os dirixentes populares gobernan para os mercados esquecendo que son representantes do pobo e non da elite económica e financieina. Controlar as variables macroeconómicas é importante pero aínda o é máis a económica familiar.

Fronte as políticas asfixiantes para os traballadores e traballadoras, que crean desemprego, pobreza e perda de dereitos, o BNG preséntase como “dique contra as políticas de recorte dos populares, obsesionados polo déficit cero”.

Neste senso, a número tres dos nacionalistas por Lugo resaltou catro dos obxectivos da súa formación: a restauración dos dereitos laborais, a creación de emprego estábel en condicións salariais dignas, a redución da taxa de temporalidade tanto no sector público como no privado e a consecución dun marco galego de relacións laborais, que propicie que estas sexas máis xutas.

Futuro de Alcoa

Ana Ermida insistiu sobre as dúbidas e a incertidume que xerou a visita do ministro de Industria, Enerxía e Turismo, José Manuel Soria, á factoría de Alcoa. “Xa noutros momentos dirixentes populares trasladaron compromisos semellantes. O 21 de xuño comprometéronse a dar unha solución en agosto, solución que nunca chegou. Agora, o ministro Soria volve a xogar ao mesmo, a comprometerse e a non ofrecer ningunha solución concreta. O único que buscar o Partido Popular e salvar a data das eleccións galegas e eludir responsabilidades no caso de que a alumieira decida pechar”.