O BNG chama aos galegos a que o domingo vivan a súa particular xornada de folga xeral contra os recortes do PP votando BNG

ERMIDA CHAMA AOS GALEGOS A QUE O DOMINGO VIVAN A SÚA PARTICULAR XORNADA DE FOLGA XERAL
CONTRA OS RECORTES DO PP VOTANDO BNG

Os nacionalistas aseguran que Feijóo intensificou a súa campaña na Mariña porque é consciente de que é onde se xoga perder o oitavo deputado por Lugo

“A presenza do BNG nos gobernos é garantía de que as reivindicacións dos lucenses e mariñáns son escoitadas e atendidas, ao contrario que co Partido Popular”

Foz, 19 de outubro de 2012. Ana Ermida, candidata número 3 do Bloque Nacionalista Galego ao Parlamento de Galiza, aproveitou o último acto da campaña, celebrado en Foz, para chamar á participación e á reflexión para que “o vindeiro domingo o país poida despedirse de catro anos de políticas de destrución, creación de paro e incremento da pobreza e iniciar unha nova etapa centrada nas verdadeiras necesidades de Galiza e dos cidadáns”.

“O Partido Popular – insistiu Ermida- é consciente de todos os seus incumprimentos coa provincia de Lugo e, en concreto coa Mariña, motivo polo que o candidato á reelección como presidente da Xunta, Alberto Núñez Feijóo, intensificou a súa presenza na comarca durante a campaña. Os populares saben que na Mariña xóganse perder ou manter o oitavo deputado pola provincia, deputado que, ademais, se disputan co BNG que podería obter un terceiro representante”.

Neste senso, a candidata nacionalista insistiu en que “a presenza de membros do Bloque Nacionalista Galego de Lugo e da Mariña nas institucións sempre foi garantía de que as reivindicacións e necesidades dos lucenses e mariñáns son escoitadas e atendidas, algo que non ocorre cos membros do Partido Popular. José Manuel Balseiro, secretario da Mesa do Parlamento galego, e José Manuel Barreiro, portavoz no Senado e presidente do Partido Popular de Lugo, levan anos ocupando postos de responsabilidade dentro do seu partido e en diferentes institucións e, sen embargo, na comarca seguimos sen un plan para a creación de emprego e fortalecemento do sector industrial e cun hospital cunha atención cada vez máis deteriorada e cuxa ampliación se converte en protagonista cada campaña electoral sen que se inicien as obras”.

Dende o BNG chaman á participación das galegas e galegos para “cambiar o rumbo de Galiza”. “O 21-O eliximos seguir sendo un país sumido no atraso ou un país que pode superar a situación de crise actual polos seus medios e facendo valer as súas potencialidades”.

“Antes da folga xeral convocada para o 14 de novembro para protestar contra os recortes do Partido Popular, o próximo domingo as galegas e os galegos temos a oportunidade de vivir a nosa particular xornada de folga para mostrar o noso rexeitamento ás políticas de Mariano Rajoy e Alberto Núñez Feijóo, cunha fórmula moito máis efectiva, acudindo a exercer o dereito ao voto e elixindo a unha forza como o BNG” – concluíu Ana Ermida.