O centro social de Morás acolleu a oitava xornada da tirada de bolos do campionato de Xove

XXIVª TIRADA DE BOLOS – XIIIª SUB 16 –  IVª LIGA FEMININA

(TEMPORADA  2012/2013)

Organiza:    Concellería de Cultura do Concello de Xove

Colaboran: IES Illa de Sarón de Xove

INCIDENCIA DA  8ª TIRADA

(Centro Social de MORÁS – Sábado, 24 de novembro 2012)

Liga Senior Masculina.- Igualadísima a cabeza, compartida neste caso polos dous primeiros da clasificación.  A victoria de Arturo Vigo e o segundo posto (terceiro consecutivo) de Rafael González fai que compartan o liderato con 63 puntos, cunha certa vantaxe sobre Sócrates, quen só puido sumar 4 puntos. Carlos Javier Rodríguez e César Cancelos resisten, e con 47 e 43 puntos respectivamente siguen á estela dos primeiros. A estas alturas, cáseque rematada a primeira volta, parece claro que entre os cinco primeiro clasificados vanse repartir os tres postos de honra finais. Non vemos neste intre dentro da clasificación xogadores que poidan inquietalos. O sexto clasificado Francisco Pérez, subcampión o pasado ano, está a cáseque 20 puntos do quinto, mostrándose ademáis moi irregular.

Liga Senior Feminina.- Outra victoria máis, terceira consecutiva, da vixente campiona, quen con 35 puntos afiánzase no liderato, con 5 de vantaxe sobre Belén Meitín; esta última, despois dun inicio potente, está a sofrir un baixón no seu xogo, xa que chegou a ir destacada no liderato. Bastante lonxe da cabeza temos a outra das favoritas, Dolores Meitín con 24 puntos, seguida de Concepción Piñeiro con 19 e Salomé Bermúdez con 11.

Liga Sub 16.- A pesares de estar inda enfermo, nova victoria de Daniel López, coa cal se afianza no liderato con 42 puntos, ampliando a súa vantaxe sobre Salomé Cardoso, segunda con 36. Isaias continúa terceiro con 27 puntos.

A vindeira tirada, última da primeira volta, vai ter lugar no Centro Social de Sumoas ESTE VINDEIRO SÁBADO 1 DE DECEMBRO, a partires das 15:00 horas (3 da tarde).