O goberno local de Cervo convida ao asesor do BNG na Deputación a contrastar as súas cifras sobre os orzamentos

O goberno local asegura que ao asesor do BNG na Deputación báilanlle as cifras dun día para outro

-O executivo cervense convida ao señor Estúa a contrastar as súas cifras sobre os orzamentos coas que manexa o goberno diante dos medios de comunicación

Cervo, 5 de xaneiro de 2013-O goberno municipal lamenta que o asesor do BNG na Deputación se volva desacreditar a si mesmo coas súas propias palabras. O executivo local explica que o señor asesor xa saíu aos medios de comunicación en dúas ocasións para criticar os gastos do goberno de Cervo, “e cada día dá un dato distinto”. “Non sabemos como fixo as contas, pero o que está claro é que lle bailan as cifras porque en cada declaración que fai, sáelle un cálculo diferente” engade o grupo de goberno.

O executivo cervense asegura que o asesor nacionalista “pon todo o seu empeño en atopar unha cifra coa que criticar ao goberno, e por iso fai operacións, suma, resta, multiplica, divide…co único obxectivo de prexudicar” pero para o equipo de goberno o realmente grave é que “cando o dato non sae ao seu gusto, inventa e terxiversa”. E é que o goberno municipal manifesta que “os números non menten e, faga o que faga o señor asesor, sempre dan como resultado que os gastos en órganos de goberno baixan este 2013 con respecto a 2012”.

O executivo local recoméndalle ao asesor cervense que “sexa máis rigoroso” e incluso reta ao señor Estúa a “contrastar as súas cifras coas que manexa o goberno diante dos medios de comunicación para rematar con tantas mentiras”.