NN.XX. de Lugo destaca e agradece as medidas do Goberno central para combater a taxa de desemprego xuvenil

NN.XX. da provincia de Lugo destaca e agradece o forte empuxe que o Goberno Central está a dar ás políticas de xuventude.

Lugo 21 de febreiro de 2013.- Novas Xeracións da provincia de Lugo a través do seu presidente, Daniel Vega, deron conta hoxe da forte aposta que o Goberno Central está a facer polos mozos, un dos sectores da poboación máis castigados pola crise e polas altas taxas de paro.

Así, o presidente provincial, Daniel Vega, recordou que nos fondos de cohesión, España obtivo a creación dun Fondo Novo para impulsar o emprego xuvenil que se dotará con 6.000 millóns de euros, dos que 3.000 millóns de euros serán de “diñeiro novo” e, dos que España levarase máis do 30%. Segundo explicou Vega, “trátase dun éxito para España, pero tamén para o conxunto de Europa”.

“Os mozos son o centro das políticas de emprego do Goberno central”. Así, Vega referiuse a algunha das medidas que se establecen dentro da Estratexia para o Emprendemento e o Emprego dos Mozos. Entre elas o popular citou unha serie delas dirixidas aos menores de 30 anos, como son unha tarifa plana á Seguridade Social de 50 euros, durante os seis primeiros meses; a compatibilidade por desemprego co inicio dunha actividade por conta propia; a ampliación de posibilidades de capitalización de desemprego, que chegará ao 100% nalgúns supostos, cando se destine o inicio dunha actividade emprendedora ou o desenvolvemento de estímulos para que os mozos desempregados podan obter o título de Educación Secundaria Obrigatoria.

Outras medidas dentro da Estratexia para o Emprendemento e o Emprego dos Mozos

Asemade Daniel Vega explicou que mentres a taxa de paro non se sitúe por debaixo do 15% o Goberno Central prevee incentivar mediante a redución da cota da empresa á Seguridade Social, a contratación a tempo parcial con vinculación formativa para os menores de 30 anos; de igual maneira; tamén se creará unha modalidade de contrato temporal, “primeiro emprego para os mozos”, con incentivos a súa transformación en indefinido e outorgaranse incentivos ao contrato en prácticas para o primeiro emprego.

Reforma Educativa

O presidente provincial referiu tamén a necesaria reforma educativa ambiciosa para facerlle fronte ao grave problema de emprego xuvenil, para mellorar a empregabilidade, para permitir que o noso país se posicione mellor na economía global e facernos máis fortes e competitivos, canalizando mellor o talento dos mozos que, na economía de hoxe, é a “nova riqueza das nacións”.

Asemade, Daniel Vega tamén resaltou a introdución da Formación Profesional Dual, que xunto ao Contrato de Formación e Aprendizaxe, proporcionará oportunidades de emprego de calidade aos mozos.