O BNG de Barreiros considera que as declaracións de Alfonso Fuente sobre a axuda á gardería municipal pretenden ocultar a súa “nefasta xestión”

O BNG DE BARREIROS DILLE A ALFONSO FUENTE QUE DEIXE DE MENTIR PARA TAPAR A SÚA INCAPACIDADE Á FRONTE DO CONCELLO.

Barreiros, 21 de febreiro de 2013. O BNG de Barreiros considera que as declaracións vertidas por Alfonso Fuente a respecto da axuda á gardería municipal non pretenden máis que ocultar a súa nefasta xestión, a súa incapacidade para solucionar os problemas municipais e tentar ocultar e desviar a atención das súas declaracións sobre as queixas pola baixada do salario.

“Alfonso Fuente minte, din os nacionalistas, cando asegura que se retirou unha axuda á gardería municipal de Barreiros por parte da Deputación Provincial. Desde o grupo nacionalista explican que a liña de axudas á que se acollía esta subvención desapareceu no ano 2012 para atender a outros servizos sociais aos que o ente provincial tivo que facer fronte tras deixar de ser financiados pola Xunta ou o Goberno central segundo o caso.”

Ademais, recordan desde o BNG que “a xestión de Alfonso Fuente e a súa cabezonería política levouno a rexeitar a proposta feita polos nacionalistas no ano 2007 de integrar a escola infantil no Consorcio Galego da Igualdade e o Benestar, integración que tería aforrado ao Concello uns 65.000 euros anuais ao facerse cargo da gardería a propia Xunta. Porén, naquel momento o Alcalde non quixo asinar este convenio, como fixeron moitos outros concellos, que permitiría contar con ese servizo e con outros, como un centro de día, dentro da rede galega sen custe, ou cun custe moito menor, para o Concello de Barreiros.”

Polo tanto, os nacionalistas pídenlle a Alfonso Fuente “que deixe de mentir e que explique a xestión real que lle está aplicando a este concello e á gardería municipal en concreto. E que explique que, pola súa falla de vontade, pola súa teima persoal, a gardería supón unha carga económica para o Concello de Barreiros ao non estar transferida á Xunta. Que explique que é por iso polo que está cargando ás familias con custos que poderían ser asumidos pola Administración galega que, ademais, é o que contempla a nova lexislación sobre administración local.”

Pero ademais, os nacionalistas recórdanlle a Alfonso Fuente que quen reduciu as transferencias ao concello foron a Xunta e o Goberno do Estado, gobernados polo Partido Popular, tal e como recolle o informe de intervención do propio Concello a respecto do ano 2012. O mesmo informe que recolle literalmente que as transferencias realizadas pola Deputación Provincial aumentaron nese ano. “Polo tanto, conclúen os nacionalistas, o Alcalde de Barreiros debería deixar de buscar e rebuscar desculpas en calquera cousa, deixar de botar balóns fóra e debería comezar a asumir as consecuencias do seu xeito de xestionar este concello e explicarlles ás veciñas e veciños que a situación actual vén dada, en grande medida, por decisións que el e o seu equipo de goberno estiveron adopatando durante estes anos.”