Os atletas do CD Egovarros-Viveiro acadan seis medallas no Campionato Galego de Cross de Veteranos

O domingo celebrouse en Santiago o Campionato Galego de Cross de Veteranos, no circuíto do Monte do Gozo, cunhas condicións climatolóxicas adversas que non axudaron ós atletas veteranos. Con chuvia e frío durante toda a competición os atletas veteráns disputaron o Campionato Galego cunha altísima participación de atletas de todos os clubes galegos.

Os atletas do CD Egovarros-Viveiro volveron a estar a un altísimo nivel acadando 6 metais, 4 medallas de ouro, 1 de prata e 1 de bronce. Os metais foron acadados na categoría femenina en W-50, Manuela Guisasola acadou o Campionato Galego e a súa compañeira en W-60 Francisca Romasanta tamén se proclamou campioa galega. No apartado masculino en M-45, Victor Sande fíxose coa prata demostrando estar recuperado das lesións que o tiveron apartado durante boa parte da tempada pasada, en M-60 o seu compañeiro Antonio Hernández proclamouse campión galego e Jesús Bernal fíxose coa medalla de bronce, en M-70 Antonio Cabana tamén se proclamou campión galego da súa categoría.

A próxima cita para os atletas do clue vivairense será o Campionato Galego de Veteráns de 10 km en ruta a celebrar o día 2 de marzo na localidade de Padrón.