Burela, 18 de abril de 2013. O Concello de Burela mantén un ano máis as Escolas Deportivas Municipais, que veñen funcionando desde o curso 1996-1997 de forma ininterrompida. A concelleira burelesa de Deportes, Beatriz Piñeiro, está satisfeita co funcionamento das Escolas: “atendemos a douscentos cincuenta rapaces e rapazas de forma gratuíta nos tempos de crise que estamos a vivir, e ofertamos deportes e actividades que doutro xeito os rapaces e rapazas que os practican non atoparían”.
Piñeiro afirma categórica que “non a todo o mundo lle gusta o fútbol, o fútbol-sala ou o baloncesto, polo que a función do Concello debe ser acercar certos deportes á infancia e á xuventude, aínda que tamén somos conscientes de que non podemos ofertar todo o que nos piden”.
A concelleira de Deportes ten as cousas claras: “se podemos, manteremos a gratuidade aínda en tempos de crise, porque é precisamente nestes tempos cando temos que demostrar a preocupación pola formación dos nosos nenos e nenas. E isto é así, porque a filosofía das Escolas Deportivas Municipais non busca formar deportistas, senón formar e educar persoas e poder conciliar a vida laboral e familiar partindo da actividade deportiva e entendendo a mesma como demostrativa dos valores de traballo, esforzo, auto estima, respecto mutuo, valores que entendemos que desde o Concello debemos potenciar”.
As Escolas Deportivas Municipais do concello burelés ofertan sete actividades distintas. Así, no tenis hai agora mesmo corenta e tres alumnos inscritos en tres grupos feitos por niveis e idades. En bádminton hai dez alumnos inscritos e once en tenis de mesa. En patinaxe lúdico son corenta e cinco os alumnos e alumnas inscritos. Así mesmo, no apartado de xogos pre deportivos e psicomotores hai quince alumnos no CEIP Virxe do Carme e outros tantos no Vista Alegre, que se fan a través das Anpas dos dous centros.
Ademais, o Concello oferta a actividade de ballet, que conta con corenta alumnos inscritos repartidos en dous grupos atendendo ó nivel e á idade; esta actividade impártese na Casa da Cultura os xoves pola tarde. E tamén se oferta patinaxe artística, cun total de setenta e cinco inscritos, que se distribúen en tres grupos atendendo a criterios de nivel e idade. Esta actividade impártese no Pavillón dos Castros os martes pola tarde.
Beatriz Piñeiro salienta que “en ballet quedaron en lista de espera dez nenos e nenas e uns vintecinco en patinaxe artística; pero é que a situación é a que é e non damos para máis. Isto aínda é máis motivo de satisfacción, se cabe, porque tentamos optimizar todo o posible as instalacións que temos. Ademais, o Concello ten un monitor deportivo na súa plantilla de persoal, que se encarga de organizar e mesmo levar á practica un bo número de actividades”.
A concelleira de Deportes tamén é moi concreta noutro campo da súa competencia: as subvencións a clubs deportivos que contan con escolas deportivas. “O ano pasado non se deron subvencións porque non había capacidade económica no Concello para dalas, e isto explicouse creo que con bastante claridade; a decisión foi moi difícil de tomar porque o propio alcalde é consciente do que iso significa, pero non había outra solución. Para este ano estamos estudando a posibilidade de recuperar as subvencións, que en todo caso non cumprirían as nosas expectativas nin por suposto as do clubes que contan con escolas deportivas. A decisión que se tome explicarase suficientemente para que non quede ningunha dúbida”, engadiu Beatriz Piñeiro.
Finalmente, a edil popular manifestou que “seguro que hai persoas que pensan que as Escolas Deportivas Municipais non valen para nada; nós estamos nas antípodas, xa que aínda que só atendéramos a un alumno ou alumna, e temos douscentos cincuenta de deportes que non son precisamente de elite, xa nos dariamos por satisfeitos”.
Os servizos sanitarios trasladaron ao hospital a tres persoas implicadas nunha colisión frontal en Castro de Rei. Unha delas tivo que ser excarcerada polos Bombeiros de Vilalba. Contra as 11:15 horas, un particular informou ao 112 Galicia dun choque entre dous vehículos no quilómetro 71 da N-640, á altura da parroquia de Viladonga. Desde o punto, os alertadores sinalaron que unha persoa permanecía atrapada. Desde o Centro Integrado de Atención ás Emerxencias activouse un operativo no que participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada. Os bombeiros liberaron á persoa, que foi trasladada xunto con outros dous feridos ao hospital en ambulancia.
A viaxe, enmarcada no proxecto «Relevo Xeracional: O Futuro do Mar» e organizada en colaboración co GALP Itsas Garapen Elkartea, permitiu achegarse a iniciativas como Kofradia Basque Seafood, a Escola de Pesca de Ondarroa, AZTI, Albaola ou o Itsas Museo de Donosti, así como a proxectos vinculados directamente á actividade pesqueira e á divulgación, incluíndo o uso de realidade virtual. O intercambio con Euskadi permitiu coñecer modelos que combinan formación, investigación, transmisión do coñecemento e modernización do sector, contribuíndo a identificar novas vías para facilitar a incorporación da mocidade á actividade pesqueira e garantir a continuidade das comunidades costeiras galegas.
A artista, referente da música popular galega, conectou cun público diverso que gozou dunha sesión vermú marcada por máis de trinta anos de traxectoria. O concerto serviu tamén como despedida e recoñecemento a Valentín González e Viviana Pérez, que deixan a organización da comisión de festas tras dúas décadas. O deputado de Mocidade, Daniel García, destacou a importancia da implicación veciñal para manter vivas as celebracións que fortalecen a identidade comunitaria e reafirmou o apoio da Deputación ás redes asociativas e á programación cultural en galego. A actuación forma parte da iniciativa provincial para achegar música tradicional e en galego a todos os públicos.
Cómpre sinalar que este produto conta cun distintivo de calidade diferenciada, a Indicación Xeográfica Protexida Faba de Lourenzá, un dos 36 selos recoñecidos en Galicia que amparan a súa excelencia. Neste sentido, a Xunta vén de lanzar a nova marca Aquí Sabemos, coa que se busca reforzar o coñecemento e a identificación por parte dos consumidores dos produtos alimentarios galegos protexidos por figuras de calidade diferenciada.
Co sol ocultándose e a lúa asomando entre as torres de Donlebún, o músico e divulgador reivindicou o poder evocador e transformador do bravú fronte á morriña paralizante. Na sala de lectura da biblioteca, Souto explicou a evolución do rock bravú no imaxinario galego, evocando as músicas populares que acompañaron durante décadas os remolques dos pascualiños e os labores comunitarios, e lembrando a vitalidade de grupos como Skornabois, Diplomáticos de Monte Alto, Xenreira, Zënzar, Pinto de Herbón ou os Rastreiros. A boa lembranza da súa anterior visita levou ao artista a pechar a velada interpretando o “Himno de Ribadeo”, composto por Arturo Mogo, nun final cheo de afecto pola vila e pola súa identidade cultural.
O evento ofrecerá mel, produtos de tempada, artesanía, gastronomía e outras propostas locais. O Concello do Valadouro mantén aberto o prazo de inscrición para persoas e empresas expositoras, que poden presentar a súa solicitude na sede electrónica ou nas oficinas do Centro Socio-cultural, Xuvenil e da Terceira Idade “Manuel Lourenzo” ata o martes 6 de outubro, ou ata completar os postos dispoñibles.
Neste espazo radiofónico Félix Jorquera falou coa alcaldesa de Lourenzá, Rocío López; co concelleiro de Cultura, Manuel Arango; con José Cuadrado, presidente da Indicación Xeográfica Protexida Faba de Lourenzá e pregoeiro desta edición da festa; co chef Pedro Barreira; e con Antonio Irimia, presidente do club VespaFaba & Clásicos, de Lourenzá. Por diante queda toda unha fin de semana chea de actividades arredor da faba de Lourenzá. Os organizadores animan a acudir a esta cita.
