Balance positivo de ACISA Ribadeo cunha ocupación hoteleira do 80%

Ribadeo, 2 de abril de 2013. ACISA fai un balance positivo da Semana Santa en Ribadeo “xa que durante estes días miles de persoas se achegaron a disfrutar do seu descanso entre nós”.

Segundo os datos que baralla ACISA a ocupación hoteleira situouse en torno ao 80%, “houbo varios hoteis que colgaron o cartel de completos durante os festivos e a fin de semana, mentres que outros chegaron ao 75, 80 e ao 90%, tanto en Ribadeo como noutras parroquias do municipio”. Para a directiva de ACISA “estas cifras son máis que aceptables, se temos en conta que a Semana Santa este ano caeu moi cedo, se temos en conta a crise pola que atravesa o país e tamén o tempo tan desapacible que se rexistrou e que afortunadamente nos concedeu unha tregua tanto o sábado coma o domingo”.

Desde a Asociación de Comerciantes, Industriais, Servizos e Autónomos de Ribadeo engaden que “os bares, mesóns e restaurantes se beneficiaron tamén da presenza dos miles de turistas que chegaron a Ribadeo estes días, así como dos torneos e campionatos deportivos que se celebraron esta fin de semana na localidade. O comercio tamén rexistrou un movemento importante ao longo da última semana, algo no que incidiu a apertura dos nosos establecementos asociados o día de Xoves Santo pola mañá e tamén o domingo, día de apertura normal no comercio ribadense desde fai moitos anos”.

ACISA destaca que “quen nos visitaron elixiron Ribadeo en moitos casos para coñecer e visitar a praia das Catedrais, pero tamén para achegarse a Rinlo, ao porto deportivo, para disfrutar da ría, do comercio e da gastronomía. A todos eles lles agradecemos o seu paso polo municipio estes días e animámolos a que repitan noutras datas e a que lles conten aos seus amigos e achegados o moito que Ribadeo e as súas xentes lles ofrecen”.