Galiza Nova A Mariña destaca a importancia da soberanía nacional no marco do 39 aniversario da Revolución dos Cravos

Ribadeo, 26 de abril de 2013. O pub O Rockuncho de Ribadeo acolleu, esta tarde noite, unha xornada reivindicativa organizada pola formación de Galiza Nova na Mariña baixo o lema “O povo é quem mais ordena!” que serviu para lembrar a Revoluçâo dos Cravos, cando se cumpren 39 anos do seu estalido.

Durante este acto conmemorativo proxectouse o vídeo “25 de abril de 1974” seguido dun coloquio coa responsábel comarcal do BNG, Ana Ermida, baixo o título “Do 25 de abril á Troika”, onde se afondou na importancia que para os pobos ten a soberanía.

Segundo explicou Ermida, o 25 de abril, coñecido como o ‘Día da Liberdade’, “contribúe a manter viva a memoria dun feito que supuxo o derrubamento da ditadura e a conquista das liberdades en Portugal. A ditadura en Portugal xa non vén da man de Salazar mais si da Troika. Portugal xa non pode decidir as súas medidas económicas, producíndose así unha degradación progresiva das condicións de traballo, eliminación de dereitos socias e un empobrecemento xeralizado. Portugal loita, a día de hoxe, por recuperar a soberanía”.

“A análise da situación que se viviu naquel momento en Portugal – continuou a responsábel comarcal- permítenos afondar na situación que atravesa hoxe en día ese país e que é unha boa mostra da situación que viven os pobos de Europa e que se pode trasladar a pobos limítrofes como é o caso da Galiza”.

“Dende o BNG vimos insistindo na idea de soberanía nacional, posto que cremos impresdincíbel que os pobos poidan decidir por si mesmos á hora de aplicar as políticas que máis lle interesen ás cidadás e aos cidadáns e que se lles outorgue a capacidade de decidir o futuro do País fronte ás políticas neoliberais que imperan actualmente”, concluíu Ermida.