O BNG de Viveiro, pide no Pleno Municipal, a reprobación pública dos deputados e deputadas do PP de Galiza, que apoiaron a quita das preferentes e subordinadas no Congreso

Bernardo Fraga, Portavoz do BNG en Viveiro, indicou esta mañá, “resulta paradóxico e lamentable, que o PP vote en Compostela a favor da proposta do BNG de evitar a quita, e os deputados e deputadas galegas do PP en Madrid, entre os que se atopa o concelleiro de Viveiro, Jaime De Olano, fagan exactamente o contrario no mesmo día”.

Viveiro, 3 de maio de 2013. O BNG de Viveiro, presentará o vindeiro luns no rexistro do Concello de Viveiro unha moción, na que se solicita ao pleno o acordo de reprobar públicamente aos 15 deputados e deputadas do PP no Congreso dos deputados polas graves consecuencias que o seu apoio a aprobación da norma que legaliza a quita ás persoas titulares de participacións preferentes e débeda subordinada lle causan a milleiros de aforradores en Galiza, centos deles en Viveiro.

Bernardo Fraga, Portavoz Municipal declarou esta mañá “As medidas de roubo á miles de persoas, a través das quitas, amparadas polos acordos dos deputados e deputadas do PP no Congreso, son unha burla á cidadanía e aos miles de afectados, e legalizan un roubo escandaloso”

“Preguntámonos que farían as deputadas e deputados galegos do PP no Congreso, se estiveran no Parlamento Galego, que faría o Sr. De Olano, se en lugar de ser deputado en Madrid o fose en Compostela? Engadiu o Portavoz do BNG”

Para o BNG de Viveiro, o cinismo do PP neste asunto non ten límites, o desprezo que nun só día lle fixeron a miles de afectados, merece unha reprobación pública contundente por parte da Corporación Municipal e de todas as veciñas e veciños de Viveiro.

O Sr. De Olano, e mais os seus compañeiros do PP puxéronse novamente do lado da banca que mentiu e estafou a milleiros de persoas. O PP serve aos grandes capitais e a banca, en lugar de atender ás persoas estafadas e buscar a solución para o seu problema, que non é outra que a devolución de todos os seus aforros.