O Consello de Administración do Breogán dá luz verde á saída da Deputación do accionariado do Club

Lugo, 29 de maio de 2013. O Consello de Administración da Sociedade Anónima Deportiva (SAD) do Club Baloncesto Breogán, acordou, na súa xuntanza desta tarde, apoiar a decisión da Deputación Provincial de Lugo de saír do accionariado do Club e iniciar xa este proceso. Así o anunciou o vicepresidente da institución provincial e delegado de Deportes, Antonio Veiga, quen afirmou que “esta decisión coincide coa postura que sempre defendeu o Bloque Nacionalista Galego (BNG) e que é contraria a que as administracións públicas formen parte do accionariado das sociedades anónimas deportivas”.

“Polo tanto –insistiu Veiga- non é un posicionamento novo a raíz da necesidade do Club Deportivo Lugo de converterse en Sociedade Anónima Deportiva o cal tampouco actuou como motivación para saír do Breogán. Os nacionalista xa defendemos o mesmo hai máis de 10 anos cando a Deputación lucense, dirixida polo Partido Popular, acordou formar parte da SAD do Club Baloncesto Breogán”.

Desde a Deputación asegúrase que se está a traballar para que a saída do accionariado non supoña a disolución da sociedade deportiva. “O noso obxectivo non é disolver a sociedade”,precisou Veiga. “Queremos deixar o accionariado dando os pasos necesarios para evitar, tamén, unha hipotética deslocalización do club; faremos todo canto poidamos para que o Breogán volva aos seus propietarios orixinais: os lucenses e os seus afeccionados e afeccionadas. O equipo xurídico da institución está estudando xa todas as opción posíbeis para escoller a que sexa máis vantaxosa para todos”.

Veiga concluíu que a Deputación, e en concreto a área de Deportes, seguirá apostando polos equipos e xogadores e xogadoras da provincia. “Gobernar significa establecer prioridades e neste intres, con taxas históricas de desemprego e feche de empresas, temos que destinar os recursos públicos a garantir o benestar social e promover a creación de postos de traballo, pero máis alá do contexto actual, non podemos empregar os fondos públicos para financiar empresas privadas”.