O PSdeG lamenta as “graves consecuencias” que empezan a xurdir coa nova xestión sanitaria do PP na provincia de Lugo

Os socialistas destacan que “son os propios profesionais os que están a advertille á Xunta de que non vai polo bo camiño”, coa ralentización dos hospitais comarcais pola dependencia de Lugo e a política de non substitución de prazas.

O PSdeG de Lugo lamenta “os primeiros indicios” das “graves consecuencias que xa empezan a xurdir” coa nova xestión integrada única do PP na provincia. Os socialistas advirten de que “este goberno leva a sanidade cara o modelo doutras comunidades autónomas, abrindo a porta á privatización e o aforro sempre por riba da calidade asistencial e as necesidades dos veciños”. O secretario provincial de Sanidade, Miguel Rodríguez Lois, destaca que “xa non é que o diga o PSOE nin outro partido político, senón que son os propios profesionais os que están a advertirlle á Xunta de que non vai polo bo camiño”.

Rodríguez Lois apunta que “ao PP empézaselle a caer o engano con feitos”, e “agora xa non pode seguir co seu discurso e ocultar máis que as áreas de Cervo e Monforte xa non son autónomas”, despois de que se coñeza o novo organigrama oficial da xestión da sanidade na provincia “no que queda ben claro a subordinación destas áreas e a dependencia de Lugo”. Unha vez implantado este sistema, afirma Rodríguez Lois, “agora empezamos a ver como os sanitarios da Costa xa se queixan da ralentización e burocratización en calquera toma de decisión ou movemento, que debe ter o visto e prace de Lugo”. Asimesmo, o “novo modelo de aforro por riba de todo e de beneficio á sanidade privada queda patente coas queixas dos profesionais do HULA, que denuncian a baixa calidade asistencial e a sobrecarga de traballo por non cubrir baixas de persoal”.

O socialista, tamén profesional médico, volve insistir na “absoluta necesidade” de que o PP “pense o que está a facer e dea marcha atrás”, porque do contrario “o que agora son pequenas consecuencias iniciais vai levar a Lugo e a Galicia cara un modelo de desmantelamento da sanidade pública, en especial no rural, con danos que serán irreversibles a curto e medio prazo”.