Yolanda Pedreira lamenta o enfado do PSOE “porque Cervo teña un GES”

Cervo, 23 de maio de 2013-A edil Yolanda Pedreira lamentou hoxe “o malestar do PSOE porque Cervo conseguise un Grupo de Emerxencia Supramunicipal, a pesar da oposición dos socialistas”. Para Pedreira o seu enfado era “esperable” tendo en conta que “foron eles mesmos os que no seu momento fixeron todo o posible para impedir que Cervo tivese un parque de bombeiros”. Un servizo que nun principio “ía ter sede no noso municipio e que ao final, por decisión do PSOE, rematou noutro concello máis afín a eles”.

A edil laiouse tamén de que “o PSOE poña tanto empeño en que Cervo non sexa sede de nada, antepoñendo os seus intereses partidistas aos dos veciños”. Aínda así, e “a pesar dos esforzos dos socialistas, Cervo terá un Grupo de Emerxencias Supramunicipal, e niso tivo moito que ver que o alcalde de Cervo sexa vicepresidente da Fegamp”.

Uns GES que xa deron os seus primeiros pasos coa sinatura do convenio entre a Xunta, a Fegamp e a Deputación que tivo lugar esta semana en Lugo. Un acto ao que “o alcalde de Cervo acudiu, ao igual que todos os demais rexedores da provincia que serán sede dun GES” explica Pedreira, “á marxe de que tamén asistira como vicepresidente da Fegamp”.

Pedreira rematou asegurando que a diferenza entre o principal partido da oposición e o goberno de Cervo queda moi clara: “Mentres os socialistas traballaban para desviar o parque de bombeiros previsto para Cervo a outro concello, nós traballamos para atraer o GES a Cervo”.