Besteiro pecha xuño con case 5.000 quilómetros en ruta en máis de 20 visitas a cidades e comarcas

José Ramón Gómez Besteiro, aspirante á secretaría xeral do PSdeG, pechou hoxe o mes de xuño con case 5.000 quilómetros percorridos en ruta en máis de 20 visitas abertas á militancia en cidades e comarcas das catro provincias do país. Besteiro seguirá cos encontros no mes de xullo cara ao proceso de cambio do partido ata completar todas as zonas de Galicia. O socialista rematou un mes moi activo esta noite en Santiso, cos militantes do interior coruñés, onde volveu reivindicar a “unión sen fisuras” do PSdeG.

O socialista insistiu na importancia de que o PSdeG “volva ter unha soa voz”, e para iso apelou á “responsabilidade e o compromiso co partido, coa cidadanía e con Galicia” de todos. “Se non son o elixido estarei detrás apoiando a quen o sexa, e ese debe ser o compromiso de todos, porque Galicia necesita un partido e un proxecto socialista sólido de futuro”, apuntou. Besteiro destacou ademáis o “xogo limpo” dos compañeiros que xa deron un paso adiante para aspirar á secretaría xeral, e puxo este proceso como “exemplo para outros partidos”.

Sobre as visitas xa realizadas, Gómez Besteiro destacou a “boa acollida, as gañas de falar de política, de implicarse e de elevar o tono do discurso” da militancia. “Estes encontros están a ser moi positivos, porque constatan o que din os nosos 135 anos de historia: que hai partido e materiais para construír de novo unha alternativa de goberno progresista pola esquerda”, afirmou.