O Bloque dille a Feijóo e a Rueda que Barreiros non é a súa finca particular cun alcalde-capataz á fronte

Despois da sentenza do TSXG pola que se anula o acordo co Consello da Xunta de 26 de maio de 2011 de aprobación definitiva do Plan Sectorial de Barreiros por ser contrario a dereito, as declaracións do presidente da Xunta, máximo responsable do referido acordo, non son nin mais nin menos que unha fuxida cara adiante e unha cortina de fume para tapar unha das mais grandes vergoñas do goberno do Partido Popular presidido por Feijóo: a anulación por parte da xustiza dun acordo que respaldaba o maior pelotazo urbanístico de Galiza dos últimos anos que se pretendía efectivizar destinando 14 millóns de euros do erario público para dotar de servizos ás urbanizacións que por lei tiñan que ter feito anteriormente os seus promotores.

O BNG advírtelle a Núñez Feijóo, a Alfonso Fuente e ao Partido Popular que o PXOM terá que ser para ordenar urbanísticamente e con criterios racionais o territorio do concello de Barreiros, primando sempre o interese xeral , e así mesmo, advírtelles que o PXOM non pode ser para dar carta de legalidade ao que fraudulentamente intentaban legalizar co Plan Sectorial anulado pola xustiza, xa que ese parece ser o motivo da urxencia do PP por acelerar agora o Plan Xeral, despois de estaren 3 anos sen mover un só papel.

En febreiro de 2010, o alcalde de Barreiros formalizaba a adxudicación dos traballos de elaboración do PXOM coa sinatura pública da contratación dos mesmos. Neste punto hai que dicir que ningún concelleiro do BNG foi convidado no seu momento á mesa técnica de contratación dos mesmos. Resulta curioso tamén que a mesma persoa que aparece asinando con Alfonso Fuente por parte da empresa adxudicataria, manifestábase tamén o 2 de decembro de 2006 na praza do concello de Barreiros xunto con Xosé Manuel Barreiro, Balseiro e outros cargos do PP, tal como recollen graficamente os xornais do día seguinte, para defender a desastrosa xestión urbanística de Alfonso Fuente. E debe recordarse tamén que nesa época, esa persoa era portavoz municipal do PP no seu concello.

Tres anos despois daquela sinatura, o goberno do Partido Popular en Barreiros foi incapaz de facer público nin un só papel relativo ao PXOM. Pola contra, do único que sabemos é da sentenza do TSXG que bota abaixo o pelotazo que intentaba o PP en Barreiros e sabemos tamén de que a Audiencia abre investigacións por prevaricación ao alcalde de Barreiros.

E por último, desde o BNG advírtenlle tamén ao Sr. Feijóo e moi especialmente ao Sr. Rueda, máximos responsables do Partido Popular que o concello de Barreiros non é a finca particular do PP, aínda que Alfonso Fuente sexa a marioneta dos intereses do PP galego en Barreiros.