O BNG de Burela advirte das “mentiras do PP sobre as contas municipais” e califica como “perdido para Burela” este segundo ano de goberno

Despois de dous anos de goberno do PP, a valoración que fan dende o BNG da situación do Concello é “doutro ano máis perdido para Burela”. “Porque todo o que diciamos hai un ano é perfectamente válido para 12 meses despois: nula xestión do equipo de goberno (ningún proxecto de futuro, ningunha obra nova, ningún novo servizo), gasto de máis de 100.000 € nas tres dedicacións exclusivas que non se xustifican no traballo que fan, incremento dos impostos municipais (grande subida do IBI e de todas as taxas e prezos públicos) e nada de apoios económicos ás asociacións e clubs deportivos de Burela. Seguimos coa metade das rúas ás escuras, seguimos pagando por todo (polo deporte, polos servizos sociais, por casar…) e seguimos pagando por viaxes e máis viaxes do Alcalde que ningunha xestión nova aportan ao noso concello”, segundo explican os nacionalistas.

“Agora, iso si, en espírito triunfalista e en enganar os veciños e veciñas falando da economía municipal non hai quen lle gañe ao PP de Burela. E estoume a referir ás últimas valoracións que, sobre as contas do Concello, facían o Alcalde e o concelleiro de Economía”, continúan.

“Dicían dende o equipo de goberno que, a 30 de maio, tiñan os pagos das facturas ao día. Pois, esta é a primeira mentira, porque precisamente no Pleno que se celebrou ese mesmo día se recoñeceron algunhas facturas do ano 2012 que estaban sen pagar (facturas da festa castrexa do ano pasado e doutras actividades que se desenvolveron nos últimos meses do 2012 que estaban sen pagar case oito meses despois)”, recordan dende o BNG de Burela.

E, relacionada con estas facturas “sen pagar do ano 2012”, advirten, “está a segunda mentira do PP no goberno municipal: din que a súa premisa é “non gastar máis do que se ten”. Pois ben, estas facturas sen pagar do ano 2012 (case 51.000 €) correspóndense con gastos feitos que non tiñan cartos para pagarse. Gastaron 51.000 € máis da conta e por iso houbo que recoñecer estas facturas extraxudicialmente no Pleno de maio deste ano. Menos mal que non gastan máis do que se ten…”

Seungo os nacionalistas, a “terceira mentira do equipo de goberno do PP é falar de que o anterior goberno municipal deixou máis de un millón de euros en facturas “sen consignación presupostaria”. Debe de ser que o Alcalde ten mala memoria ou que cando estaba na oposición non se enteraba moito do que pasaba por Burela porque estaba sempre en Lugo, porque dicir que non había consignación presupostaria para esas facturas é mentir sobre as contas municipais”.

Nese sentido, cren que “o que si está claro é que, tan mal non debían de estar as contas municipais que deixamos o anterior equipo de goberno, porque cartos hai para pagar os máis de 100.000 € que cobran as tres persoas do PP que teñen dedicación exclusiva; porque cartos hai para pagar os máis de 7.000 € en dietas que cobrou o Alcalde o ano pasado nas súas viaxes polo mundo adiante e porque cartos hai para pagar os máis de 3.000 € en dietas que levan pasados nos tres primeiros meses do ano 2013 o Alcalde e os concelleiros/as do equipo de goberno para seguir viaxando polo mundo”.

“Este é o resumo do segundo ano de goberno municipal do PP en Burela: outro ano perdido porque nada novo fixeron nin fan. Outro ano de viaxes do alcalde e os seus concelleiros e concelleiras, pagadas por todos nós, que xa suman máis de 10.000 €. Outro ano máis sen subvencións para asociacións e colectivos. Outro ano máis de subida de impostos e outro ano máis de escuridade en Burela”, conclúen.