O BNG de Foz en contra da supresión do profesorado da escola infantil para abrir a de Alfoz

Foz a 4 de xullo de 2013.- O BNG de Foz manifesta o seu total rexeitamento á pretensión da Xunta de Galiza de eliminar unha educadora da escola infantil de Foz para o curso que vén para abrir a escola de Alfoz.

Aínda que é cuestionable a necesidade da apertura dunha escola infantil con 5 nenos cando hai outra a menos de 5 quilómetros con suficientes prazas como é a do Valadouro, o que non é admisible é que se lle saquen recursos humanos a outras escolas que teñen demanda de prazas para abrir unha nova. A escola infantil de Foz ten hoxe unha gran demanda. Hai que recordar que este curso quedaron fóra 47 nenos e nenas entre idades de 0 e 3 anos o que da idea da necesidade de construír unha nova escola infantil ou ampliar a existente. “O que menos necesita Foz e que lle saquen educadores das súas escolas infantís. Ao contrario, necesita que se doten de máis”, afirma o portavoz municipal do BNG, Xan Carlos González Basanta.

Está claro que o PP está actuando desde o poder con criterios exclusivamente partidistas porque esta decisión non ten outra xustificación. E neste sentido, quixeramos saber o que opina o alcalde de Foz sobre que nos reduzan a calidade asistencial e educativa dunha escola que pagamos todos e todas as veciñas de Foz e que aínda mantemos en parte. “Temo que o alcalde sexa neste caso como noutros moitos un alcalde que di amén a todo o que lle mandan desde Santiago” asegura Basanta.

Para o BNG esta é unha mostra máis da acción de goberno do PP na Xunta, que en vez de ampliar e mellorar a calidade dos servizos e de crear emprego público prefire amortizar prazas, destruír emprego e desmantelar pouco a pouco a calidade hoxe excelente das nosas escolas infantís públicas.