O BNG rexistra no Parlamento galego unha Proposición non de lei sobre a Operación Bebé de Lugo

O Grupo Parlamentar do Bloque Nacionalista Galego ven de rexistrar unha Proposición non de lei para o seu debate en Pleno na que se insta ao Goberno galego a iniciar unha investigación interna sobre a Operación Bebé de Lugo.

A Proposición non de lei recolle o seguinte texto para o seu debate en Pleno:

As investigacións iniciadas nos xulgados de Lugo e as reiteradas denuncias ante a prensa sobre supostas irregularidades na tramitación de expedientes de adopción de bebés orixinan esta iniciativa parlamentaria. O grupo parlamentar do BNG considera prioritario que o goberno galego inicie unha investigación interna sobre as posíbeis irregularidades cometidas por hospitais públicos galegos e casas de acollida de mulleres embarazadas a respecto da legalidade vixente en materia de adopción e remita toda esa información a esta cámara coa finalidade de despexar calquera dúbida sobre tales irregularidades.

Nese sentido e segundo informacións aparecidas na prensa, existe a posibilidade de que as mulleres estiveran asinando documentos descoñecendo o contido dos mesmos, incluso sendo enganadas polas propias autoridades sanitarias. Consideramos que o goberno galego debe actuar para esclarecer os feitos que veñen de ser denunciados.

Por isto e ante a situación de alarma creada consideramos necesario:

“O Parlamento galego insta ao goberno galego a:

1. Iniciar unha investigación de inmediato na provincia de Lugo para esclarecer calquera tipo de irregularidade por parte do SERGAS ou da Consellaría de Traballo e Benestar no referido aos protocolos de adopción.

2. Remitir ao Parlamento toda a información dispoñíbel ao respecto para o coñecemento e valoración dos grupos parlamentarios.

3. Remitir ao Parlamento os expedientes das mulleres que foron acollidas no Hogar Madre Encarnación nos últimos catro anos.

4. Comparecer no Parlamento galego a persoa responsábel de Benestar para dar as explicacións pertinentes a respecto das denuncias sobre posíbeis irregularidades nos trámites de adopción, como pode ser o engano por descoñecemento do idioma.

5. Asemade, e para despexar calquera dúbida sobre o cumprimento da legalidade en materia de adopción, o goberno galego elaborará un informe sobre a adopción en Galiza especificando con claridade os expedientes de adopción derivados de entidades relixiosas que acollen a mulleres para o parto e posterior adopción dos bebés”.