O GPP achega documentación pola que denuncia a situación do asesor que cobra do ente provincial traballando na sede do BNG de Foz

O Grupo Provincial Popular achega documentación sobre a denuncia efectuada con respecto das irregularidades detectadas en relación cun traballador, persoal eventual da administración provincial, que prestaba os seus servizos na sede do BNG de Foz.

Os populares achegan documentos que proban os seus argumentos en relación á valoración feita polo voceiro nacionalista, Mario Outeiro. Nesa liña, explican que “calquera pode comprobar a corrección de erros no Boletín Oficial da Provincia que aparece publicada na páxina 4 do BOP do xoves 11 de xullo de 2013” a través do seguinte enlace: http://www.deputacionlugo.org/portal_localweb_ag/RecursosWeb/DOCUMENTOS/1/0_8354_1.pdf#PAGE=4

Polo tanto, manteñen as acusacións manifestadas na xornada deste xoves 11 de xullo sobre o Goberno da Deputación de Lugo que “pretende agochar baixo unha corrección de erros a moi probable situación fraudulenta, denunciada nas pasadas datas, do asesor que cobra do ente provincial pero traballa na sede local do BNG de Foz”.

Os populares fixeron público o Decreto aprobado pola Presidencia da Deputación e asinado con data 17 de xuño de 2013, polo que o Goberno bipartito corrixe o nomeamento de Xoán Antón Estua como persoal eventual adscrito a un área de Goberno provincial (a de Cultura, Turismo, Ensino e Normalización Lingüística e Patrimonio Histórico) e decide adscribilo agora ao Grupo Provincial do BNG.

REITEGRO DOS SALARIOS PERCIBIDOS
Desde o PP xa adiantan que esixirán o reintegro dos salarios indebidamente percibidos por esta persoa que formalmente traballaba para un área de goberno da administración provincial, pero “o facía en realidade para o seu partido, como era público e notorio, limitándose a funcións estritamente partidistas”.

O Partido Popular cuestiona ademais que “esta corrección de erros con dous anos de atraso teña algún sentido, salvo o de recoñecer que esta era unha situación como mínimo irregular, e que incluso podería ter relevancia xurídica, polo que non descartan trasladar os feitos á Fiscalía”.

“O Goberno bipartito provincial tería incorrido ademais nun abuso das súas competencias, extralimitándose nas súas funcións normativas, para encubrir unha posible fraude moito maior: agochar que unha persoa que cobra da Deputación e percibía un salario por formar parte da área de goberno e traballa en realidade, como é público e notario, para o BNG e na sede que os nacionalistas teñen na localidade de Foz”, explican os populares.