Primeira exposición dos proxectos desenvoltos no Estudio Aberto

Lugo, 11 de xullo de 2013. O delegado de Cultura e Turismo da Deputación de Lugo, o nacionalista Mario Outeiro, inaugurou, xunto con Encarna Lago, xerente da Rede Museística Provincial, a exposición na que se recollen os proxectos desenvoltos polos creadores que participan na Residencia I do programa Estudio Aberto, un programa que se organiza no marco do proxecto Enredarte. A mostra estará aberta ao público, na sala de exposicións do Pazo de San Marcos, ata o vindeiro 28 de xullo.

Durante a súa intervención, Mario Outeiro destacou a calidade dos proxectos presentados e explicou aos asistentes os traballos cos que se van atopar: “as creacións con lápis de Reme Remedios, a pintura a través da fotografía de Gema López, a pintura e a escultura de Loamrti, o debuxo en continuo na montaxe de 20 metros de Senén Olano, así como as montaxes de Isabel Alonso e Ruth Montiel”.

Este é o resultado da primeira das dúas residencias que se van a desenvolver este verán. A próxima comezará a principios de agosto e contará con outros seis artistas que exercen distintas disciplinas, seleccionados rigorosamente por un xurado de profesionais da arte e que, ao igual que nesta primeira, convivirán nun proceso de creación dialogada a través dun taller conxunto e aberto.

Neste sentido, o delegado de Cultura precisou que “coa posta en marcha desta iniciativa, a área de Cultura da Deputación ofrece unha plataforma artística para creadores de distinto carácter e de diversas disciplinas. En definitiva, un estudio aberto tanto para a sociedade como para outros artistas, así como críticos, comisarios e expertos neste eido”.