O PP solicitará un pleno extraordinario en Riotorto para evitar que o equipo de goberno renuncie á construción da residencia e centro de día

Riotorto- 24 de agosto de 2013.- Os concelleiros do Partido Popular de Riotorto solicitarán formalmente a convocatoria dun pleno extraordinario para evitar que o Equipo de Goberno local renuncie á construción da residencia da terceira idade e centro de día no municipio.

A normativa faculta aos concelleiros populares, que forman parte do grupo político máis votado no concello, a realizar esta solicitude e o alcalde está obrigado por lei a convocar nas vindeiras datas a sesión extraordinaria que de xeito monográfico trate esta cuestión

INVESTIMENTO FÓRA DO CONCELLO
Desde o Partido Popular acusan ao rexedor nacionalista, Federico Gutiérrez Estoa, de antepoñer os intereses partidistas aos do conxunto dos veciños, isto é así porque no Grupo Popular manteñen a súa sospeita sobre a existencia dun pacto dentro do BNG para que o investimento previsto na residencia de Riotorto se traslade e beneficie outro concello da Mariña. Neste senso lamentan a falta de influencia do alcalde, dentro do BNG, e a súa incapacidade para esixir que a Deputación cumpra cos compromisos que adquiriu en Riotorto, neste caso, achegar o financiamento necesario para a construción da residencia e centro de día

Os populares non renunciarán a que os veciños do concello poidan beneficiarse dunha infraestrutura de benestar para a atención á persoas maiores e dependentes e moito menos que esta renuncia sexa consecuencia da falta de xestión e deixadez de funcións do equipo de goberno local, que nun primeiro momento foi incapaz de adquirir os terreos precisos para a súa construción, pese a ter solicitado un crédito con este obxecto, e agora renunciando anticipadamente a que poida executarse esta obra.

Os populares consideran que a sesión plenaria extraordinaria será unha boa oportunidade para demostrar quen aposta e quen non pola residencia e centro de día e lamentan que se intente culpabilizar a outras administracións como á Xunta a que nin tan sequera teñen consultado sobre a procedencia deste tipo de instalacións.

VOTO FAVORABLE Á PETICIÓN DO PP
Gutiérrez Estoa e o resto dos concelleiros nacionalistas e socialistas do Equipo de goberno teñen na súa man demostrar que están a favor deste investimento votando favorablemente á petición que formula o Grupo Municipal Popular, isto é, realizar as xestións que sexan oportunas para manter, impulsar e executar o proxecto de apertura dunha Residencia para persoas maiores en Riotorto, achegando a subvención comprometida pola Deputación.

Os populares lembran que A Fonsagrada, Trabada e Pol terá unha residencia, que reúnen as mesmas condicións que a que se tiña previsto construír en Riotorto, salvo que nestes concellos probablemente hai unha xestión máis responsable e non hai alcaldes tan negativos para os seus veciños como o noso, que quere poñerse a venda antes que a ferida, renunciando a un equipamento que prometeu, enganando en definitiva ao conxunto dos veciños.