O PSdeG critica que o PP votara en contra de defender os dereitos laborais dos mariñeiros galegos afectados polos tratados da UE con outros países

Santiago de Compostela, 25 de setembro de 13. O portavoz de Pesca do Grupo Socialista, José Ramón Val, salientou que o PP ten votado en contra, no Pleno do Parlamento celebrado hoxe, dunha iniciativa socialista para pedirlle á Xunta que defenda os dereitos laborais na pesca extractiva, de transformación e comercio no caso da negociación de tratados e acordos da UE con terceiros países en materia de pesca.

O responsable socialista criticou a “desleixo de funcións” por parte do goberno galego no tocante á defensa dos dereitos laborais básicos dos galegos e galegas. Salientou que os acordos asinados pola UE con terceiros países non inclúe as debidas garantías dos dereitos laborais, que nalgún caso “non admiten comparación coas existentes en Europa”.

O PP tamén rexeitou que os acordos estean “condicionados ao cumprimento de normas equiparables ás da UE en materia hixiénico sanitaria, sociolaboral, medioambiental e, en xeral, en todo canto é esixible aos produtores e as empresas europeas que capturan, transforman en comercializan peixes e mariscos nos países membros”.

Val advertiu que “existen diferenzas apreciables en canto ás políticas de conservación e preservación dos recursos naturais que fai que aquilo que é perseguible e punible no territorio da UE e para as empresas aquí radicadas, acabe nos lineais dos nosos centros comerciais como produtos elaborados procedentes de terceiros países en base a algún tratado internacional”.

Investigación
O Pleno do Parlamento si que aprobou en troques a parte da iniciativa socialista que lle reclama á Xunta a que acade o deseño de mecanismos de investigación e avaliación dos recursos pesqueiros obxecto do tratado e acordo que sexan obxectivos, veraces e homologados internacionalmente”.

A finalidade é “facilitar o coñecemento dos mesmos e permitan a súa explotación racional e sostible”, establecendo ademais “mecanismos de penalización para os casos de incumprimento de todos ou parte destes principios”.

Salientou a “incongruencia do PP, que non votou os principios de respecto aos dereitos dos traballadores, ás medidas hixiénicas e o respecto medioambiental” cando ao mesmo tempo votan a favor da penalización dos ditos principios.