O BNG pídelle á Xunta que inclúa nos orzamentos partidas suficientes para a ampliación do Hospital da Costa, a creación do hospital de día oncolóxico e a posta en marcha dun plan de emprego

A Mariña, 9 de novembro de 2013. O BNG presentará no debate parlamentario dos orzamentos da Xunta de Galiza emendas de entidade coas que pretenden “que os orzamentos sexan reais e adecuados ás necesidades das veciñas e dos veciños da Mariña”. Segundo o BNG, “o proxecto orzamentario que presenta o Partido Popular vén a continuar na liña dos últimos anos, desatendendo necesidades da poboación como son os servizos sanitarios ou o emprego”.

Para o BNG “uns orzamentos públicos teñen que servir para mellorar a calidade de vida das persoas e non para aplicarlles recortes en servizos básicos.” No caso da Mariña, a cantidade que se destina, segundo explicaron os seus cargos na Mariña aínda que non aparece como tal no proxecto, á ampliación do Hospital da Costa é irrisoria e vén a confirmar a falta de credibilidade e de compromiso do Partido Popular neste aspecto. Por esta razón, desde a formación frontista presentarán diversas emendas para que se incremente o orzamento destinado á ampliación do Hospital e tamén para que se poña en marcha un hospital de día oncolóxico de calidade e que garanta a prestación do servizo cos medios técnicos e humanos necesarios.

O mesmo acontece nunha cuestión tan prioritaria como é o ámbito do emprego. Mentres na Mariña seguen a darse expedientes de regulación de emprego e peches de empresas punteiras, o Partido Popular mira para outro lado e volve a incumprir os seus compromisos a respecto de dotar á comarca dun plan de acompañamento para todas as persoas que sofren a lacra do paro. Por esta razón, o BNG considera prioritario nas súas emendas que se contemple unha dotación orzamentaria para pór en marcha un plan de emprego na comarca que impida o seu desmantelamento industrial e condene á poboación mariñá á emigración.

Ademais, o BNG reclamará que a Xunta asuma parte da financiamento das unidades de servizos sociais, escolas infantís e do SAF básico. Igualmente, solicitará a inclusión nos orzamentos de partidas para costear infraestruturas fundamentais na comarca como a VAP Ferrol-San Cibrao, a estrada LU-124 Mondoñedo-Vilameá, nos tramos Vilameá-Riotorto e Riotorto-Mondoñedo ou as residencias da terceira idade de Foz e Ribadeo.

Os nacionalistas tamén solicitan a redistribución dos 6,07 millóns de euros que a Xunta prevé investir na dotación de servizos ás urbanizacións en Barreiros. Desde o BNG achegan propostas para que ese diñeiro se reparta para todo o concello e serva para dotar de servizos á totalidade do municipio.