O Concello entrega as cartillas de nivel ao alumnado dos cursos da Escola Infantil de Natación de Cervo

Cervo, 2 de xaneiro de 2014- O Concello de Cervo celebrou este xoves, na piscina municipal de Lieiro, a súa habitual festa acuática infantil, con inchables e xogos na auga. Unha cita estivo aberta a todos os nenos e nenas, usuarios habituais ou non da piscina.

Antes tivo lugar o acto de entrega das cartillas de nivel ao alumnado da Escola Infantil Municipal de Natación, que se fixo coincidir no día coa festa para que ao remate puidese gozar tamén desa actividade. Trátase dunhas cartillas de progreso que se entregan cada tres meses e que funcionan a modo de pasaporte para, no seguinte trimestre, poder acceder a un novo nivel.

Cada cartilla indica un nivel de destrezas na auga, e cada un deles está relacionado cunha cor e cun animal mariño. Así, o nivel 1 é o cangrexo; o nivel 2, o pato; o 3 a tartaruga; o 4 a foca; o 5 o delfín; e o 6 o tiburón e, ao mesmo tempo, teñen deseños infantís e atractivos adaptados ás súas idades. Cada un deles inclúe diferentes criterios de avaliación e, entre outras habilidades, valóranse as capacidades de inmersión, a respiración, os desprazamentos, os saltos, as flotacións, os estilos de natación a diferentes distancias, ou os mergullos, todos eles a distintos niveis de esixencia.

Deste xeito, os monitores poderán controlar os avances e progresos de cada alumno e adaptar a súa aprendizaxe ao seu nivel. O edil de Deportes, Luis Guillén, que participou na entrega xunto ao alcalde, Alfonso Villares, asegura que a través deste sistema “os nenos e nenas practican a natación máis motivados coa ilusión de acadar uns obxectivos concretos”.