Espectáculo contra a violencia de xénero en Alfoz

Fanny e Danny, da orquestra Chévere, visitaron Alfoz para ofrecernos o seu espectáculo “I’ll be watching you”, actividade educativa contra a violencia de xénero a base de música e de palabras. Foi o pasado venres, día 24 de xaneiro, no Salón de Actos da Casa da Cultura de Alfoz e con organización da Delegación de Asuntos Sociais do concello. Asistiron ó acto os alumnos da ESO do Instituto Alfoz-Valadouro, acompañados dos seus profesores. Falando e cantando, Fanny fixo pensar ós asistentes sobre eses comportamentos inxustos e machistas que aínda perduran na nosa sociedade, e fíxoo a base de analizar as letras de diversas cancións, algunhas das cales demostraron ser tremendamente retrógradas no que ás relacións amorosas se refire. O espectáculo resultou emocionante e entretido. Demostrounos que aínda queda moito que cambiar na nosa sociedade.