Outeiro acusa ó Goberno central de afondar no estrangulamento económico ás persoas autónomas e ás PEMES

Lugo, 17 de xaneiro de 2014. O delegado de Cultura e Turismo e voceiro do BNG na Deputación de Lugo, Mario Outeiro, criticou, este venres, na rolda de prensa posterior á Xunta de Goberno da institución provincial, o incremento das cotizacións mínimas para as persoas autónomas que contan con dez ou máis persoas empregadas no último ano, unha das últimas decisións adoptadas polo Goberno central relativas ao incremento dos custos sociais. Unha medida que representa unha suba do 22 por cento, o que se traduce en case 60 euros ao mes e que en palabras de Outeiro “afondará no estrangulamento económico ás persoas autónomas e emprendedoras”.

Este incremento tamén se producirá na base mínima para persoas autónomas, que é a cotización maioritaria tanto na provincia de Lugo como en Galiza, o que dificultará a recuperación económica deste sector da poboación activa e mesmo contribuirá a unha maior desaparición de pequenas empresas, mentres se limita a súa capacidade de xeración de emprego, principal problema económico en Galiza e no Estado.

Neste sentido, Mario Outeiro recalcou que “chama a atención que, nunha situación económica crítica para moitas persoas autónomas e titulares de PEMES, se incrementen as cargas sobre estas unidades económicas, máis aínda cando, paralelamente se incrementan as axudas a grandes empresas, ao mesmo tempo que se manteñen sobre elas enormes vantaxes fiscais que impiden ao Estado manter políticas económicas anticíclicas”.

Estas medidas foron adoptadas polo Goberno central co suposto obxectivo de facer viábel a Seguridade Social, que para o presente ano terá un déficit de máis de 10.000 millóns de euros. Neste contexto, o conxunto de reformas que gravarán con máis cargas ás persoas autónomas terán un impacto de menos de 1.000 millóns, polo que non contribuirá a resolver este problema ao mesmo tempo que provocará nefastas consecuencias para a maioría de empresas do tecido produtivo. A isto hai que sumarlle o feito de que o citado déficit ten unha causa directa na acusada baixa de cotizacións por mor da redución salarial, impulsada polas políticas do Goberno, sobre todo desde a reforma laboral.

Para Mario Outeiro “o mecanismo máis eficaz para a sustentabilidade da Seguridade Social pasa por unha reforma fiscal e políticas activas de emprego que reduzan a enorme taxa de paro, por asegurar o mantemento o nivel salarial de todos e todas as traballadoras, e non por incrementar as cotizacións aos segmentos máis vulnerábeis do tecido empresarial nun momento que atravesan serias dificultades económicas”.